د ملګري ملتونه د بشري حقونو عالي کمېشنر فولکر تورک د ایران د وروستیو سراسري اعتراضونو پر مهال د تاوتریخوالي د راپورونو، په ځانګړي ډول د خلکو د وژل کېدو، په اړه جدي اندېښنه څرګنده کړې ده.
فولکر تورک ویلي، د اعتراضونو پر مهال د مرګژوبلې ټولې پېښې باید ژر تر ژره، په خپلواک او بېطرفه ډول وڅېړل شي. هغه ټینګار کړی چې د بشري حقونو د هر ډول سرغړونې عاملینو سره باید د نړیوالو اصولو او معیارونو له مخې حساب وشي.
هغه د ایران حکومت لهخوا د انټرنېټ د سراسري پرې کېدو په اړه اندېښنه ښودلې او ویلي یې دي، دا ډول اقدامات د بیان ازادي او معلوماتو ته د خلکو لاسرسی کمزوری کوي. د هغه په وینا، د انټرنېټ بندښت نه یوازې د بشري حقونو د سرغړونو د مستندسازۍ بهیر اغېزمنوي، بلکې د خلکو اړینو او بېړنیو خدمتونو ته پر لاسرسي هم ناوړه اغېز لري.
فولکر تورک له ایراني چارواکو غوښتي چې د بشري حقونو نړیوال مکلفیتونه ته درناوی وکړياو د اعتراضونو پر وړاندې د تاوتریخوالي پر ځای د قانون او حساب ورکونې لاره خپله کړي.
