طالبان وايي تېره اوونۍ د اوسپنې پټلۍ له لارې څه باندې ۱۵۷ زره ټنه انتقالات شوي
د طالبانو د ټولګټو چارو وزارت ویلي، چې په تېره یوه اوونۍ کې د حیرتان، اقینې، تورغونډۍ او خواف ـ هرات د اوسپنې پټلۍ له لارې ۱۵۷,۹۹۹ مټریک ټنه مالونه انتقال شوي دي.
د طالبانو د ټولګټو چارو وزارت ویلي، چې په تېره یوه اوونۍ کې د حیرتان، اقینې، تورغونډۍ او خواف ـ هرات د اوسپنې پټلۍ له لارې ۱۵۷,۹۹۹ مټریک ټنه مالونه انتقال شوي دي.
د طالبانو یاد وزارت د یکشنبې په ورځ په یوه خبرپاڼه کې ویلي، چې د مرغومي له ۱۲مې تر ۱۸مې نېټې پورې د ټولګټو چارو وزارت د اوسپنې پټلۍ له لارې ټولټال ۱۵۷,۹۹۹ مټریک ټنه مالونه انتقال کړي دي.
د طالبانو د ټولګټو چارو وزارت ویاند محمد اشرف حقشناس ویلي، چې په یادو انتقالاتو کې ۱۰۶,۹۸۴ مټریک ټنه د حیرتان بندر، ۷,۷۸۰ ټنه د اقینې بندر، ۱۸,۹۸۱ ټنه د تورغونډۍ بندر او ۲۴,۲۵۴ ټنه د خواف ـ هرات له لارې انتقال شوي دي.
حقشناس ویلي، چې تېره اوونۍ د اوسپنې پټلۍ له لارې د ۱۲۶ ټنه وچې مېوې صادرات هم شوې دي.
د طالبانو د ټولګټو چارو وزارت ویلي، هڅه کوي چې د اوسپنې پټلۍ له لارې د لا ډېرو انتقالاتو لپاره زمینه برابره او سوداګرو ته اړین سهولتونه چمتو کړي.
په یوه ترلاسه شوي مکتوب کې لیکل شوي، چې د طالبانو د سرې میاشتې ټولنې د بریښنا لیک پر بنسټ د قطر سره میاشت د ۲۰۲۵ میلادی کال د مارچ میاشتې له لومړی نیټې څخه د شهاب الدین دلاور زوی کریم الله دلاور ته امتیازي معاش ورکوي.
د طالبانو په سرې میاشتې ټولنه کې سرچینو وویل، چې ددې ډلې د سرې میاشتې رییس شیخ شهاب الدین دلاور خپل زوی ته د قطر سرې میاشتې ټولنې ترڅنګ د ډنمارک سره صلیب، ترکۍ سرې میاشتې او د ناروې له سره صلیب څخه امتیازي معاشونه اخلي.
دوی زیاتوي، چې پخوانۍ رهبرۍ د سرې میاشتې ټولنې کارمندانو ته ۳ زره افغانۍ امتیازي معاش ټاکلی و خو شهاب الدین دلاور د مامورینو یاد امتیازي معاش بند کړ.
د طالبانو د سرې میاشتې ټولنې ځینو کارمندانو نیوکه وکړه، چې شهاب الدین دلاور نه یوازې یو زوی ته بلکې د زامنو په ګډون ګڼو خپلوانو ته ورته امتیازي معاشونه له ډونرانو څخه اخلي.
افغانستان انټرنشنل د طالبانو سرې میاشتې ټولنې رییس شهاب الدین دلاور د اداري فساد او د خپلوانو د ګمارنو په اړه رسمي مکتوبونه خپاره کړل خو نوموړی تر دې دمه کوم غبرګون نه دی ښودلی.
تیره ورځ افغانستان انټرنشنل - پښتو د سندونو له مخې راپور خپور کړ، چې د طالبانو تر واک لاندې د افغاني سرې میاشتې ټولنې عمومي مشر شهاب الدین دلاور د خپلې لور خسر «مولوي حفیظ الله» په سره میاشت ټولنه کې په لومړی بست کې د خپل مشاور په توګه ټاکلی دی.
سرچینې وايي، چې مولوي حفیظ الله د سرې میاشتې د قراردادونو په فساد کې پراخ لاس لري.
د روان کال د مرغومي پر دویمه افغانستان انټرنشنل - پښتو داسې سندونه ترلاسه کړل، چې له مخې یې د طالبانو تر واک لاندې د افغاني سرې میاشتې ټولنې عمومي مشر شهاب الدین لاور خپل زوم شکرالله شاکر په خپله اداره کې د یوه کال په موده کې څوځله پر بېلابېلو څوکیو ګومارلی دی. په یوه مکتوب کې لیدل کیږي چې شکرالله شاکر ځان پخپله د خپل خسر د دفتر رییس ټاکلی دی.
له دې وړاندې هم افغانستان انټرنشنل ـ پښتو ته رسېدلو سندونو کې ښودل شوې، چې د طالبانو د افغاني سرې میاشتې ټولنې مشر شهاب الدین دلاور خپل څو تنه نژدې کسان له کانونو وزارت څخه بېولي او په دې ټولنه کې یې مقرر کړي دي.
دا په داسې حال کې ده، چې د ملا هبت الله د فرمانونو او حکمونو د تعقیب او نظارت ریاست څه موده وړاندې د طالبانو ټولو ملکي او نظامي ادارو ته لارښوونه کړې وه، چې د دې ډلې د مشر له فرمان څخه اطاعت وکړي، چې وايي، « د خپلوۍ او انډيوالۍ پر بنسټ دې په ادارو کې څوک نه ګوماري».
په دغه مکتوب کې، چې افغانستان انټرنشنل - پښتو ته هم رسېدلی و، ویل شوی وو، چې «د خپلوۍ له مخې د اشخاصو ګومارل د الله د نارضایتۍ او عذاب سبب کیږي»
