اوکرایني چارواکو ویلي، چې د روسیې لهخوا پر کییف د جمعې د ورځې له بریدونو وروسته د څه باندې زرو اپارتمانونو برېښنا پرې شوې او د پلازمینې کییف اوسېدونکي د سړې هوا له امله له ستختو ستونزو سره مخ دي.
د اوکراین ولسمشر ولادیمیر زېلېنسکي په یوه ویډیويي پیغام کې ویلي، چې د روسيي په بریدونو کې د کییف د انرژۍ د ویجاړ شوي سیستم د بیارغولو کار دوام لري.
نوموړي زیاته کړې: «د جمعې د ورځې له بریدونو څخه وروسته په کییف کې د انرژۍ سیستم د بیارغولو کارونه دوام لري، خو د ټولو ودانیو د برېښنايي تودوخي سیستم باید ژر ورغول شي».
زېلېنسکي ویلي، چې د کییف د انرژۍ د سیستم د رغولو لپاره ۲۰۰ بېړنۍ ډلې په کار لګیا دي.
اوکرایني چارواکو وړاندې ویلي وو، چې تېره اوونۍ روسیې پر اوکراین څه باندې ۱۱۰۰ بېپیلوټه الوتکې او له ۸۹۰ ډېر رهبري شوي هوايي توغندي ویشتي، چې له امله یې د پلازمینې د انرژۍ سیستم زیانمن شوی دی.
د شاه محمود میاخېل لیکنه که د تېرو پنځو لسیزو په اوږدو کې د افغانستان پروړاندې د ایران او پاکستان دوهمخې پالیسۍ وڅېړل شي، نو څرګندېږي چې دواړو هېوادونو کابو ورته چلند درلود.
که څه هم ایران له امریکا سره مخالفت درلود، خو د شوروي اتحاد د یرغل پر مهال ایران د پاکستان په څېر د مجاهدینو له ډلو ملاتړ کاوه. په داخلي جګړو کې هم ایران د پاکستان په څېر بېلابېلې جنګي ډلې چې د ایران د ګټو سره وفاداره وې، پیاوړې کولې.
د پاکستان په څېر ایران هغه ډلې او افراد چې د دوی د ګټو لپاره ګواښ ګڼل کېدل، کمزوري کول او لهمنځه وړل، څو په جنګي ډلو او اشخاصو کنترول او نفوذ ولري. د طالبانو د لومړي ځل له سقوط وروسته که څه هم ایران له امریکا سره مخالفت درلود، خو د پاکستان په څېر یې د بن د پرېکړو ملاتړ وکړ. د جمهوریت د رامنځته کېدو په ترڅ کې بیا ایران د پاکستان په څېر د هارډ او سافټ پاور له لارې یې د طالبانو په ګډون بېلابېلې ډلې او افراد پیاوړي کړل، څو د افغانستان حکومت کمزوری او په پایله کې سقوط وکړي.
د طالبانو له بیا واکمنېدو وروسته، ایران او پاکستان د تېرو پنځو لسیزو د دوهمخیزو پالیسیو په څېر له یوې خوا له طالبانو سره ښې اړیکې ساتي، خو له بلې خوا د طالبانو مخالفینو ته یې په خپلو هېوادونو کې ځای ورکړی، څو د طالبانو د کمزورتیا لپاره ورڅخه په خپل وخت ګټه واخلي. همدارنګه، ایران او پاکستان د افغان کډوالو پر وړاندې د جبر او فشار لارې ډېرې کړې، څو هغوی خپل هېواد ته ستانه شي. دواړو هېوادونو له افغانانو سره د ټولو انساني، اخلاقي، اسلامي او د ښه ګاونډیتوب اصولو خلاف نهایت محدود او سخت چلند کړی دی.
ایران او پاکستان دواړه د افغانستان د اوبو او شتمنیو پر وړاندې سترګې نیولي او غواړي، چې د افغانستان منابع لوټ کړي او په دغه هېواد کې یو کمزوری حکومت واکمن وي. د جمهوریت پر وخت او هم د تېرو جګړو پر مهال ایران او پاکستان دواړو پراخې ګټې تر لاسه کړې او د اټومي وسلو او نورو پرمختللو وسلو څښتنان شول.
د جمهوریت په شل کلنه دوره کې په ایران کې د اخوندانو استبدادي رژیم واکمن و، په پاکستان کې هم پوځي استبدادي رژیم شتون درلود او په شمالي ګاونډیو هېوادونو لکه تاجکستان، ازبکستان، ترکمنستان او چین کې استبدادي او اولیګارکي رژیمونه واکمن و. یعنې افغانستان په دې سیمه کې یوازینی هېواد و، چې نسبتا ولسواکي او د بیان ازادي پهکې موجوده وه.
دا چې د یو هېواد مثبت او منفي تحولات په ګاونډیو هېوادونو هم اغېز لري، نو په افغانستان کې د امریکا د شتون مخالفت ته په کتو ټولو ګاونډیو هېوادونو په ځانګړې توګه ایران او پاکستان، هڅه کوله، چې په افغانستان کې واقعي ولسواکي پلي نهشي، ځکه که ولسواکي پلي شوې وای، د دې ولسواکۍ مثبتې اغېزې به په دغو هېوادونو کې هم څرګند شوي وای او هلته استبدادي او انحصاري رژیمونه به لهمنځه تللي وای.
په دې توګه، ایران او پاکستان په مستقیمه او غیرمستقیمه توګه د افغانستان د ولسواکۍ د کمزورتیا لپاره د هارډ او سافټ پاور له لارې اقدامات وکړل، څو جمهوریت کمزوری او سقوط وکړي او یوه مذهبي افراطي ډله واکمنه شي. هدف دا و، چې خپلو خلکو ته وښيي چې د دوی استبدادي نظامونه د طالبانو په پرتله غوره دي، ځکه په دواړو هېوادونو کې اساسي قانون موجود دی، ټاکنې تر یوه حده ترسره کېږي، د نجونو او نورو تعلیمي ادارو وضعیت ښه دی او د خلکو د ژوند کچه د افغانستان په پرتله لوړه ده.
خو د ایران او پاکستان ولسونه د اخوندانو او پوځ په کړنلارو نیوکې لري او قدرت په یوې ځانګړې طبقې پورې محدود دی، چې اکثریت ولس په پرېکړو کې برخه نهلري. د ایران اخوندان او د پاکستان جنرالان د هېواد شتمني لوټي او د ځانونو لپاره یې د طالبانو د مشرانو په څېر رفاهي ژوند برابر کړی دی. په مقابل کې، عام ولس او اکثریت وګړي د اقتصادي ستونزو او فقر سره مخ دي.
که څه هم په هر ولسي پاڅون کې بهرني فکتورونه او لاسوهنې شتون لري، خو تل داخلي وضعیت د لاسوهنې زمینه برابروي. د ایران اوسني لاریونونه په حقیقت کې د اخوندانو د پنځوس کلنې واکمنۍ مستقیم محصول دی، چې پهکې د ښځو پر وړاندې بد چلند، مذهبي تبعیض، فقر، اقتصادي رکود، د ریال په پرلهپسې توګه ښکته کېدل او د فرهنګي او ټولنیزو محدودیتونو دوام شامل دی.
افغانستان هم د ایران په څېر په تېرو شاوخوا پنځو کلونو کې له ناوړه وضعیت سره مخامخ دی. د ملایانو یوه ځانګړې طبقه واکمنه ده، ولس د بیان د ازادۍ حق نه لري، فقر ورځ تر بلې زیاتېږي، د نجونو په تعلیم محدویتونه شته، اساسي قانون عملي نه دی، طالبان ولس ته ځان مسوول نه ګڼي او د طالبانو واک ولسي او نړۍوال مشروعیت نه لري. د افغانۍ ثبات مصنوعي بڼه لري او که یو ناڅاپه د افغانۍ ارزښت کمېدو پیل شي، افغانان به د ایران په پرتله هم په بد وضعیت کې پاتې شي. په همدې دلیل، طالبان هم د ایران د وضعیت د بدلون په اړه اندېښمن دي.
د ایران د لاریونونو د زور اخیستو دلیل دا دی، چې اخوندانو په تېرو پنځو لسیزو کې د هېواد لویې سرچینې لکه نفت او ګاز په شخصي پانګونو او جګړو مصرف کړي دي. ایران له عراق سره اته کاله مستقیمه جګړه درلوده، چې دې جګړې د ایران اقتصاد ته ستره ضربه ورکړه. سربېره پر دې، په سوریه، لبنان، غزه، عراق او یمن کې په غیرمستقیمو یا نیابتي جګړو کې د ایران بېپروا مصرف او همدارنګه د شتمنیو ډېره برخه د پوځي تجهیزاتو په جوړولو کې مصرفېږي. کله چې یو هېواد خپله ډېره بودیجه په جګړو او نیابتي جګړو مصرفوي، طبیعي خبره ده چې ولس ته خدمات نه وړاندې کېږي او خلک د فقر سره مخامخ کېږي. که څه هم د ایران ولس تر یوه حده د اسراییل سره په جګړه کې د ایران د اخوندانو د رژیم ملاتړ د نیشنالیزم له امله کړی، خو خلک د پرلهپسې جګړو ښکار دي او د دوی د ژوند کچه ورځ تر بلې د فقر سره مخ کېږي.
همدغه حالت په افغانستان کې هم لیدل کېږي؛ ولس د پاکستان د مستقیم تېري په اړه د نیشنالستي احساساتو پر اساس د طالبانو ملاتړ کړی، خو دا ملاتړ دایمي نه دی، ځکه خلک ښه ژوند، تعلیم، د فقر مخنیوی، د بیان ازادي او په پرېکړو کې قانوني شراکت غواړي. افغانستان د ایران په پرتله په بد وضعیت کې دی، ځکه د طالبانو مشر څوک نه ویني، د طالبانو واک ولس ته ځان مسوول نه ګڼي، طالبان ولسي او نړۍوال مشروعیت نه لري او د افغانستان د بودیجې د مصرف معلومات له ولس سره شریک نه دي. په بدخشان او نورو سیمو کې د خلکو پر کانونونو چور روان دی. یادونه اړینه ده، چې د یو هېواد سرمایه او شتمني د هېڅ یو حاکم رژیم ملکیت نه دی، بلکې د ولس سرمایه ده او باید د قانون په چوکاټ کې ولس ته حساب ورکړل شي؛ خو دا حساب ورکول په افغانستان، ایران، پاکستان او نورو ګاونډیو هېوادونو کې نهشته.
د ایران او پاکستان ولس د افغانانو په پرتله ډېر منسجم او باخبره دي او د تعلیم او سیاسي پوهاوي کچه هم لوړه ده. په پاکستان کې یو عادي کراچیوان هره ورځ اخبار لولي، خو په افغانستان کې د اکثرو تعلیمیافته کسانو چې درسونه پای ته رسېدلي، نه اخبار لولي او نه کتابونه او فکر کوي چې فیلسوفان دي. د طالبانو د راتګ سره د ځوانانو په ذهنیت کې منفي فکرونه هم زیات شوي، ځکه دوی باور لري چې تعلیم بېګټې دی، ځکه تعلیمیافته کسانو ته د کار فرصتونه نهشته.
په ټوله کې د ایران ولس د اخوندانو له حاکمیت څخه په تنګ راغلي دي. که د ایران کې ولسي قیام بریالی کېږي، د دغه قیام اغېزې په افغانستان هم دي.
دا چې د ایران پالیسي په تېرو پنځو لسیزو کې د افغانستان د ټولو حکومتونو او رژیمونو پر وړاندې تخریبي وه او د افغانستان له جنګونو یې ګټه اخیستې، نو په اوس وخت کې مهمه مسله دا ده: که په ایران کې د اخوندانو نظام له منځه لاړ شي او پر ځای یې داسې نظام رامنځته شي چې د ایران د ولس په خوښه وي، دا د افغانستان په ګټه ده. خو که د اخوندانو نظام پاتې شي او داخلي کشمکشونه او جګړې دوام وکړي، نو دا د افغانستان په ګټه نه دی، ځکه چې په سیمه کې افراطي ډلې پیاوړې کېږي او په پایله کې د سیمې ټول هېوادونه له دوامداره ناورین سره مخامخ کېږي.
همدغه حالت په افغانستان کې هم لیدل کېږي. که د طالبانو د حاکمیت پر ځای داسې یو نظام رامنځته شي، چې ولس د اساسي قانون په رڼا کې د کار، ژوند، سیاست او د بیان ازادي حق ولري، نو دا به یو مثبت بدلون وي. خو که د طالبانو د واک په شتون یا له منځه تګ سره بیا کورني جنګونه او نیابتي جګړې رامنځته شي، نو دا به هېڅ مثبت بدلون نه وي.
د افغانستان ستونزې د ایران په پرتله ډېرې ژورې دي، ځکه ایران پراخې منابع لري او له نړۍ سره د اوبو او وچې له لارې بدیلې لارې او متبادلې اړیکې لري. خو د افغانستان نه یوازې منابع محدودې دي، بلکې د ایران په څېر متبادلې نړۍوالې لارې هم نه لري. که په ایران کې وضعیت خراب شي، په افغانستان هم فشار زیاتېږي او ډېرې لارې به تړل کېږي. د افغانستان ولس به له سختو ستونزو سره مخامخ شي. په دواړو حالاتو کې، د ایران وضعیت په مستقیم ډول پر افغانستان مثبتې او منفي اغېزې لري.
مخکې له دې چې د افغانستان وضعیت د ایران په څېر بحراني شي، اړینه ده چې د نظام د ولسي او نړۍوال مشروعیت لپاره یوه واقعي لویه جرګه راوغوښتل شي، چې د ټول ولس او ټولو اقشارو استازولي پهکې وشي، تر څو د افغانستان د راتلونکي نظام د مشروعیت لپاره تګلاره تایید او ولس په نظام کې خپل ځای وویني.
شاه محمود میاخېل
د افغانستان د سولې او ولسواکۍ د ملي نهضت دوراني ریيس او د جمهوري غوښتونکو د خوځښت د سیاسي چارو او بهرنیو اړیکو مسوول.
د ایران د بشري حقونو یوې ډلې ویلي چې ددغه هېواد په وروستیو ولسي لاریونونو کې لږ تر لږه ۵۰۰ کسان وژل شوي دي. د بشري حقونو ډلې هرانا د وروستیو معلوماتو له مخې،۴۹۰ مظاهرهچیان او ۴۸ امنیتي کسان وژل شوي او تر ۱۰،۶۰۰ ډېر کسان نیول شوي دي.
د ایران رسمي چارواکو تراوسه د کره تلفاتو شمېر نه دی اعلان کړی، خو ددغه هېواد سپاه پاسداران ډلې اړوند خبري اژانس خبر ورکړی، چې پاموړ مرګ ژوبله شوې ده.
اعتراضونه د ډېسېمبر له ۲۸مه د خوراکي توکو د بیو د لوړېدو پر ضد پیل شوي وو، خو وروسته یې د ۱۹۷۹ کال د اسلامي انقلاب په پایله کې له را منځته شوي مذهبي حکومت سره مخالفت ته وده ورکړه. د ایران چارواکي امریکا او اسراییل د ناارامیو د رامنځته کولو په تور تورنوي.
په پلازمېنه تهران، مشهد او ګڼو نورو ښارونو کې خلک سړکونو ته را وتلي او د تغییر غوښتنه کوي.
د ایران دولتي تلویزیون د امنیتي ځواکونو د جنازو ویډیوګانې خپرې کړې او هغوی یې د “وسله والو ترهګرو” قربانیان بللي دي.
د ایران پخواني شاهزاده رضا پهلوي خلکو ته ویلي چې سړکونه پرې نه ږدی.
پاکستاني او امریکايي پوځي ځواکونو د خیبر پښتونخوا د نوښار ولسوالۍ په پبو سیمه کې د دوه اړخیزو ګډو پوځي تمرینونو دیارلسم پړاو پیل کړی دی.
د پاکستان پوځ په یوه اعلامیه کې ویلي، دغه تمرینونه د «اېنسپارېډ ګمبېټ–۲۰۲۶» تر نامه لاندې کېږي چې تمرکز یې د ترهګرۍ ضد مبارزې پر پوځي همغږۍ، روزنې او د تجربو په تبادلې دی. د اعلامیې له مخې، یاد تمرینونه به دوه اونۍ دوام ولري.
د پاکستاني پوځ په وینا، په دې ګډو پوځي تمرینونو کې د دواړو هېوادونو مسلکي او ځانګړي قطعات ګډون لري او دا د پاکستان او امریکا ترمنځ دیارلسم دوه اړخیز ګډ پوځي تمرین بلل کېږي.
دا تمرینونه په داسې حال کې پیلېږي چې پاکستان په دې وروستیو کې د وسلهوالو ډلو له زیاتېدونکو بریدونو سره مخ دی او امنیتي وضعیت د اندېښنې وړ بلل کېږي.
په همدې حال کې، څارونکي وایي چې پاکستان له امریکا سره د ترهګرۍ ضد مبارزې تر عنوان لاندې یو ځل بیا ګډ پوځي ماموریتونه پیل کړي، چې د دوی په اند، دا چاره نه یوازې د سیمې بلکې د افغانستان پر امنیتي وضعیت هم اغېز لرلای شي.
بل خوا په دې وروستیو کې د خیبرپښتونخوا د خیبر ولسوالۍ په تیرا سیمه کې د پاکستان پوځ د وسله والو د ځپلو په نوم عملیات پیل کول غواړي چې د ډیری سیاسي ګوندونو، ټولنیزو فعالانو او د خلکو له پراخ غبرګون سره مخ شوي دي.
تېره ورځ د تېرا اوسیدونکو په سیمه کې د پاکستان پوځ له خوا د عملیاتو د پیلېدو په غبرګون کې د یادو عملیاتو پرضد لاریون کړی و. دوی غوښتنه کوله چې د پاکستان حکومت دې د پښتون قوم پر ضد روان تېري پای ته ورسوي.
د سویډن حکومت د یکشنبې په ورځ اعلان وکړ چې د خپلې هوايي دفاع د پیاوړتیا لپاره ۱۵ میلیارد سویډني کرونه (شاوخوا ۱،۶ میلیارد ډالر) لګوي. د سویدن دفاع وزیر وايي، هېواد یې د ښارونو، پلونو، برېښناکونونو او نورو حیاتي بنسټونو د خوندیتابه لپاره لنډ واټنه هوايي دفاعي سیستمونه پېري.
سویډن د اروپا د نورو هېوادونو په څېر پر اوکراین د روسیې تر یرغل وروسته په پراخه کچه په دفاعي سکتور کې پانګونه کړې ده، خو د دغه هېواد پراخه جغرافیه لا هم د هوايي ګواښونو پر وړاندې زیانمنه بلل کېږي.
د سویډن د دفاع وزیر پال یونسون د شمالي سویډن په یوه امنیتي کنفرانس کې خبریالانو ته وویل: «د اوکراین د جګړې تجربې په څرګنده توګه وښوده چې قوي او دوامداره هوايي دفاع څومره حیاتي ارزښت لري».
هغه زیاته کړه چې سویډن به د لنډ واټن هوايي دفاعي سیستمونه وپېري، چې ښارونه، پلونه، برېښناکوټونه او نور حیاتي بنسټونه خوندي کړي.
همداراز، د یکشنبې په ورځ د سویډن لومړي وزیر اولف کریسترسون د ټرمپ د ادارې هغه څه وغندل چې ده د ګرینلنډ او ډنمارک پر وړاندې «ګواښوونکې ژبه» وبلله، او ویې ویل چې متحده ایالات باید له ډنمارک څخه د یو وفادار متحد په توګه مننه وکړي.
ځايي روغتیايي چارواکي وایي، چې د غزې په تړانګه کې د اسراییلي ځواکونو په ډزو کې لږ تر لږه درې فلسطینیان وژل شوي دي. دا پېښې داسې مهال دي، چې له تېر اکتوبر راهیسې د اوربند له هوکړې سره سره، لا هم تاوتریخوالی دوام لري.
د غزې د روغتیايي سرچینو په وینا، یو فلسطینی وګړی د غزې ښار په تفاح سیمه کې وژل شوی، چې د فلسطینیانو تر کنټرول لاندې ده. همداراز، دوه نور فلسطینیان د غزې په سوېل کې د خانیونس ښار ختیځ ته، په بني سهیله سیمه کې وژل شوي، چې لا هم د اسراییل تر پوځي ولکې لاندې بلل کېږي.
بل خوا اسراییلي پوځ ویلي، چې ځواکونو یې پر هغه «وسلهوال» ډزې کړې چې د غزې په شمال کې د دوی تر کنټرول لاندې سیمې ته اوښتی و او سملاسي ګواښ یې پېښ کړی و.
د پوځ په وینا، برید خپل هدف ته رسېدلی دی. خو د غزې په سوېل کې د شوې پېښې په اړه اسراییلي لوري څه نه دي ویلي.