د پروان د طالبانو امنیه قومندان محمد جاوېد ضیاءالرحمان یوې غونډې ته د وینا پرمهال ویلي، چې پخوانی جمهوریت «طاغوتي نظام» و او له ټولو نړۍوالو امکاناتو سره سره له منځه ولاړ. نوموړي له خلکو غوښتي، چې عقیده او اخلاص وښيي او له دوی سره خپل ګډ مسوولیت ادا کړي.
دغه ولایتي طالب امنیتي مسوول د دوشنبې په ورځ (د مرغومي ۲۲مه) په پروان کې د خلکو یوې غونډې ته ویلي، چې «الله ته ستاسو د کړنو او عمل پایله وه چې اوس موږ لاسته راوړنې لرو».
نوموړي ویلي، چې پخوانی جمهوریت د امریکا او د هغې د متحدینو د پراخو امکاناتو له لرلو سره سره پر ځان بسیا نه و او له منځه ولاړ.
هغه زیاته کړې: «په افغانستان کې چې څومره امکانات موجود وو، طاغوتي جمهوري نظام د امریکا او د هغې د متحدینو په ملاتړ رامنځته شوی و او د نړۍ له ګڼو امکاناتو برخمن و، خو بیا هم له منځه ولاړ».
طالبان د «طاغوت» اصطلاح د اسلامي لید له مخې هغه هر شي، شخص، ځواک یا نظام ته کاروي، چې د الله له امر څخه سرغړونه وکړي او د عبادت، حاکمیت یا اطاعت حق د ځان لپاره ونیسي.
نوموړي دا هم ویلي، چې تنخوا، څوکۍ او قدرت مهم نه دي او ټول باید خپل مسوولیت ادا کړو: «په هره برخه کې باید خپله دنده او مکلفیت ترسره کړو، که امکانات او امتیازات زیات وي او که کم. زموږ او ستاسو تمرکز باید پر مادیاتو نه وي».
طالب قومندان زیاته کړې، چې په اوسني وخت کې د امکاناتو درلودل د الله امتحان دی او باید په سم ډول خپل مسوولیتونه ادا کړو.
