د بلخ ولایت تاریخي جومات خواجه ابو نصر پارسا چې د وروستۍ زلزلې له امله زیانمن شوی و، د طالبانو د اطلاعاتو او کلتور ریاست لهخوا بیارغول کېږي. ځایي طالب چارواکي وایي، چې د جومات نږدې ۶۰سلنه د بیارغونې چارې بشپړې شوې او پاتې چارې به هم په نږدې راتلونکې کې بشپړې شي.
په بلخ کې د طالبانو د اطلاعاتو او کلتور ریاست د فرهنګ او هنر برخې مسوول ذبیحالله اریایي د جومات د بیارغونې په اړه وویل: «د بیارغونې پرمهال د جومات تاریخي لرغونتیا او ځانګړتیاوې به خوندي پاتې شي.» هغه زیاته کړه، په پلان کې ده چې د جومات سویلي اړخ ته یوه مدرسه هم جوړه شي.
د چارواکو په وینا؛ د خواجه ابو نصر پارسا جومات د بیا رغونې لپاره نږدې شپږ مېلیونه افغانۍ ځانګړې شوې دي او ټاکل شوې چې د بیارغونې چارې به یې په شپږو میاشتو کې بشپړې شي.
د بلخ دغه تاریخي جومات چې په شین جومات هم یادېږي، د ۱۴۲۱ زېږدیز کال په شاوخوا کې د تیموریانو په دوره کې جوړ شوی. د دغه جومات جوړوونکي د تیمور پېر یو لوړپوړی قوماندان میر مزید ارغون و، چې د مشهور صوفی عالم خواجه ابو نصر پارسا د مقبرې پر سر یې ودان کړی و. دا جومات د سیمې د اسلامي هنر او روحاني میراث یوه مهمه نښه ګڼل کېږي. چارواکي وایي، چې د وروستۍ زلزلې له امله د جومات زیاتې برخې زیانمنې شوې وې.
