د کډوالو ستونزو ته د طالبانو د رسېدنې عالي کمېسیون وايي، پاکستان او ایران یوازې نن له بېلابېلو لارو ۲۸۱ کډوالې کورنۍ چې شمېر یې ۱۴۹۹ کسان کېږي، په جبري ډول افغانستان ته اړولي. د کمېسیون په وینا، په همدې ورځ ۱۷۲ کورنۍ خپلو سیمو ته لېږدول شوي او له ۳۵۴ کورنیو سره مرستې هم شوې دي.
د دغه کمېسیون دارلانشاء د دوشنبې په ماخوستن (د مرغومي ۲۲مه) د یوې خبرپاڼې په خپرولو سره وايي، د تورخم له لارې ۱۰۷ کورنۍ چې د غړو شمېر یې ۵۹۳ تنه کېږي، د هلمند د بهرامچې له لارې ۹۴ کورنۍ چې د غړو شمېر یې ۵۶۴ تنه کېږي، د کندهار د سپین بولدک له لارې ۴۹ کورنۍ چې د غړو شمېر یې ۲۴۰تنه کېږي، د نیمروز د ورېښمو له لارې ۲۰ کورنۍ چې د غړو شمېر یې ۶۶ تنه کېږي او ۵۱۰ نور مساپر او همداراز د هرات د اسلامکلا له لارې ۱۱ کورنۍ چې د غړو شمېر یې ۳۶ تنه کېږي هېواد ته په جبري توګه را اړول شوي دي.
د خبرپاڼې لهمخې، له کابل څخه ۹۰ کورنۍ چې د غړو شمېر یې ۵۰۱ تنه کېږي خپلو ولایتونو ته لېږدول شوي دي.
په خبرپاڼه کې راغلي، چې ځينو دغو راستنو شویو کورنیو ته د کرایو له ورکړې او د روغتیايي خدماتو له وړاندې کېدو سربېره یو شمېر کورنیو ته پخه ډوډۍ، یوه اندازه نغدي مرستې او سیمکارټونه هم ورکړل شوي دي.
په دې وروستیو کې له ګاونډیو هېوادونو د افغانانو د جبري اېستنې زور اخیستی او په پاکستان او ایران کې مېشت افغانان د ځايي پولیسو له ناوړه چلند څخه شکایت لري او له اړوندو نړۍوالو بنسټونو غواړي، چې پر کوربه هېوادونو فشارونه زیات کړي، څو د نړۍوالو قوانینو او اصولو لهمخې له کډوالو سره چلند وکړي.
د یادونې وړ ده، چې د روانې اوونۍ په سر کې د بښنې نړۍوال سازمان د پاکستان لومړي وزیر ته په یوه استول شوي لیک کې په دغه هېواد کې د افغان کډوالو د ناقانونه نیولو، ځورولو او اېستلو په اړه اندېښنه څرګنده کړې او همداراز یې له پاکستان څخه غوښتي چې د افغان کډوالو د ځوورولو لړۍ نوره ودروي.
