د طالبانو استازي په نوي ډیلي کې د افغانستان سفارت د سرپرست په توګه د خپلې دندې د پیل خبر ورکړ. نور احمد نور د دوشنبې په ورځ د هند د بهرنیو چارو وزارت کې د افغانستان او پاکستان د څانګې له مسوول انند پرکاش سره وکتل.
د افغانستان سفارت په خپل اېکس کې د دوشنبې په ورځ (د مرغومي ۲۲مه) د یوې خبرپاڼې په خپرولو سره ویلي، چې د طالبانو لوړپوړي ډیپلومات له هندي چارواکي سره په لیدنه کې د دوه اړخیزو سیاسي او اقتصادي اړیکو او د سوداګرۍ د پراختیا په اړه خبرې وکړې.د خبرپاڼې لهمخې، نور د هند له حکومت څخه غوښتي چې د افغان سوداګرو او عامو خلکو لپاره د ویزو ورکړه اسانه کړي. هغه همداراز ټینګار کړی، چې نوي ډیلي دې د سوداګرو، زدهکوونکو او په هند کې د مېشتو افغانانو ستونزې هم په پام کې ونیسي.که څه هم نوي ډیلي د طالبانو اداره په رسمي توګه نه پېژني، خو دې ډلې ته یې اجازه ورکړه، چې د افغانستان سفارت کنټرول په لاس کې واخلي.د پخواني حکومت سفیر د ۱۴۰۲ کال په لیندۍ میاشت کې د یوې خبرپاڼې په خپرولو سره په نوي ډیلي کې د افغانستان سفارت د ټولو فعالیتونو د بشپړ درېدو خبر ورکړی و. په دې خبرپاڼه کې راغلي و: «د افغانستان د اسلامي جمهوریت سفارت په نوي ډیلي کې دایمي تړل شوی دی.»له دې سره، د هند د بهرنیو چارو وزارت بیا وروسته اعلان وکړ چې د افغانستان سفارت او کونسلګرۍ یې په ممبي او حیدراباد کې فعالې دي او افغانانو ته خپلو خدماتو ته دوام ورکوي.کله چې د طالبانو د بهرنیو چارو وزیر امیرخان متقي درې میاشتې مخکې نوي ډیلي ته سفر وکړ، ښاغلي نور هم ورسره و. په دې سفر کې متقي اعلان وکړ، چې هند منلې چې د طالبانو استازی په نوي ډیلي کې د افغانستان سفارت کې ومني.په نوي ډیلي کې د افغانستان سفارت یوه پخواني چارواکي افغانستان انټرنشنل ته ویلي، چې هند له طالبانو سره د اوسني تعامل لپاره په نوي ډیلي کې د افغانستان په سفارت کې لږ تر لږه یوه طالب ډیپلومات ته اړتیا لري.دا په داسې حال کې ده، چې هند ته د امیرخان متقي تر سفر وروسته نوي ډیلي او طالبانو خپلې اړیکې پراخې کړې دي او د متقي له سفر وروسته د طالبانو د عامې روغتیا او سوداګرۍ وزیران هم دې هېواد ته سفر وکړ.
