امریکا او سیمهییزو شریکانو یې په قطر کې د هوايي دفاع نوی مرکز پرانېست

د امریکا مرکزي قومندانۍ وايي، واشنګټن او سیمهییز شریکانو یې په قطر کې د العُدید په هوايي اډه کې د هوايي او توغندیز دفاع یو نوی همغږي کوونکی مرکز جوړ کړی دی. دا مرکز د پوځي همکاریو د پیاوړتیا او په منځني ختیځ کې د هوايي او توغندیزو ګواښونو پر وړاندې د همغږۍ لپاره ډیزاین شوی دی.
د امریکا د مرکزي قومندانۍ د معلوماتو پر بنسټ، دا مرکز چې نوم یې «د منځني ختیځ ګډ د هوايي دفاع د عملیاتو مرکز» دی په قطر کې جوړ شوی او پهکې د امریکا او په سیمه کې یې د شریکانو ځواکونه حضور لري.
دغه مرکز د جنورۍ له دولسمې خپل فعالیت پیل کړی دی.
سینټکام ویلي، چې دا نوی جوړښت به د سیمې د ځواکونو تر منځ د هوايي او توغندیز دفاع په برخه کې همغږي او یووالی پیاوړی کړي او د معلوماتو د تبادلې، د ګواښونو د خبرداري او د څو ملیتی تمرینونو او عملیاتو د پلان جوړولو زمینه برابره کړي.
په قطر کې د ګډو هوايي عملیاتو مرکز چې ۲۰ کاله مخکې جوړ شوی دمګړۍ د اوولسو هېوادونو پوځيان پهکې حضور لري.
د سنټکام قومندان براډ کوپر دا اقدام د سیمه ییزې دفاعي همکارۍ د پیاوړتیا پر لور یو مهم ګام وباله او ویې ویل، چې نوی مرکز به د سیمهییزو ځواکونو د هوایي او توغندیو د دفاع په برخه کې د مسوولیتونو د همغږۍ او شریکولو بهیر لاپسې پیاوړی کړي.
له دې سره سم، د امریکا د مرکزي هوايي ځواکونو قومندان ډرَک فرانس ټینګار کړی، چې دغه مرکز به د امریکا او سیمهییزو شریکانو ترمنځ د ګډ کار لپاره یو دایمي پلاتفورم رامنځته کړي او په ټوله سیمه کې د یو موټي هوايي او توغندیز دفاعي سیستم په پیاوړتیا کې مرسته وکړي.
