د نیمروز ولایت چهاربرجک ولسوالۍ لپاره د طالبانو ولسوال محمود سعید خبر ورکړی، چې په دغه ولسوالۍ کې یې د ۸ ټنه او ۴۵۰ کیلوګرامه انساني درملو، ټوکرو او نورو توکو د قاچاق مخه نیولې ده.
د نوموړي په وینا؛ نیول شوي توکي د څېړنو په موخه د طالبانو امنیه قوماندانۍ ته سپارل شوي او په تړاو یې دوه کسان هم نیول شوي دي. هغه له ټولو سوداګرو غوښتي، چې له ګاونډیو هېوادونو څخه د ناقانونه، بېکیفیته درملو او خوراکي توکو له واردولو ډډه وکړي.طالبانو تر دې وړاندې هم د فرعي ګمرکاتو د ګرځنده ټیمونو له لوري د سلګونه ټنه ناقانونه خوراکي او غیرخوراکي توکو له نیولو خبر ورکړی و.
له بل پلوه د طالبانو مالیې وزارت وایي، د ګمرکونو عمومي ریاست ګرځند څارونکي ټیم په تېرو درېیو اونیو کې شاوخوا ۱۳۰ټنه قاچاقي توکي نیولي دي. د یاد وزارت د معلوماتو له مخې؛ دغه توکي چې په ناقانونه ډول هېواد ته واردېدل، د کندهار، نیمروز، فراه او هلمند په بېلابېلو سیمو کې نیول شوي دي.
