د پاکستان فدرالي حکومت د خیبر پښتونخوا سر وزیر سهیل اپریدي وروستیو څرګندونو په اړه سخت غبرګون ښودلی. اپریدي وړمه ورځ ویلي و، که د افغانستان خاوره د پاکستان پر ضد د ترهګرۍ لپاره کارول کېږي؛ نو ثبوت دې وړاندې شي.
د پاکستان د کورنیو چارو د دولت وزیر طلال چودري د سهیل اپريدي ورستیو خبرو ته په غبرګونه کې ویلي، چې د افغانستان د رول په اړه د ثبوت غوښتنه له «ترهګرو» سره د خواخوږۍ نښه ده.
هغه ټینګار کړی، چې حکومت به د ملي ضد ترهګرۍ دریځ ته د یوه «ګمراه کوونکي یا مبهم لفظ» اجازه ورنه کړي. چودري ویلي، که څوک هڅه وکړي د «ترهګرو» لپاره پراخه فضا رامنځته کړي یا ورسره نرم چلند وکړي؛ نو دا د منلو وړ نهده.
د پاکستان دغه فډرالي وزیر سهیل اپريدی مخاطب کړی او ویلي یې دي: «که تاسو له دوی سره دومره خواخوږي لرئ؛ نو خپله افغانستان ته ولاړ شئ او یا به موږ ستاسو په تګ کې اسانتیاوې برابرې کړو».
نوموړي همداراز د خیبر پښتونخوا د حکومت پر کړنو نیوکه وکړه او ویې ویل، په ۲۰۲۵کال کې په «ترهګریزو پېښو» کې ۱۲۰۰کسان وژل شوي او ۶۰–۷۰سلنه بریدونه یوازې په خیبر پښتونخوا کې شوي چې د پاکستان په تاریخ کې تر ټولو لوړه مرګ ژوبله ده.
نوموړي ټینګار وکړ، چې هېڅ څوک د «ترهګرو» سره خواخوږۍ پر بنسټ د پاکستان امنیت او خلکو پر وینې د لوبې اجازه نهلري. یاده دې وي، چې سهیل اپریدي د یکشنبې په شپه د یوې غونډې پر مهال ویلي و چې حکومت باید د دغه ادعا لپاره شواهد وړاندې کړي چې افغان خاوره د پاکستان پر وړاندې د ترهګریزو فعالیتونو لپاره کارول کېږي.
هغه زیاته کړه، چې نور هېوادونه هم له افغانستان سره پوله لري؛ خو ورته شکایتونه نهلري. دغه ویډیو د پاکستان دولتي ټلویزیون (PTV) لهخوا هم په خواله رسنیو کې خپره شوې ده.
د پښتونخوا د خېبر ولسوالۍ ځایي چارواکي وایي، چې په تیرا دره کې د وسلهوالو پر ضد د عملیاتو لپاره ټولې تیارۍ بشپړې شوي او د عملیاتو له امله له سیمې څخه د خلکو د اېستلو بهیر د جنورۍ له ۱۰مې پیل او د روانې میاشتې تر ۲۵مې به دوام وکړي.
په تیرا کې پوځي عملیات؛ سبا به له سیمې څخه د خلکو د وتلو بهیر پیل شي | افغانستان انټرنشنل پښتو
د پاکستاني پوځ د دغو عملیاتو پر ضد د خېبرپښتونخوا د چارواکو په ګډون ډېری سیاسي ګوندونو، ټولنیزو فعالانو او عامو خلکو اعتراض کړی او غوښتنه یې کړې، چې د پاکستان حکومت دې د پښتون قوم پر ضد روان ظلمونه پای ته ورسوي، خو دغو غوښتنو ته هېڅ لوري په درنه نهدي کتلي.
په تېرا کې ولسي لاریون: پاکستان دې د پښتنو سره روان ظلمونه پای ته ورسوي | افغانستان انټرنشنل پښتو
د پښتون ژغورنې غورځنګ مشر منظور پښتین د دوشنبې په ماخوستن (د مرغومي ۲۲مه) په خپله فېسبوکپاڼه په همدې تړاو ویلي، د پاکستاني پوځ د دغو عملیاتو لمن له تیرا درې اوس مرکزي کُرم ته غځېدلې او هلته هم ځايي اوسېدونکو ته امر شوی چې خپلې مېنې پرېږدي او کډه وکړي.
منظور پښتین د پاکستاني پوځ دغه عملیات «ډالري جګړه» یا کرایي جګړه بولي خو په اړه یې نور جزییات نهدي ورکړي، مګر تر دې مخکې یې په ډاګه کړې وه، چې پاکستانی پوځ دغه ډول عملیات د نړۍ له زبرځواکو د امتیازونو او ډالرو د اخیستنې په بدل کې کوي.
هغه زیاتوي: «په تیرا درې او مرکزي کُرم کې د سختې یخنۍ، واورې ورېدو، د بنسټیزو اسانتیاوو د نشتوالي او دې ته اړ کېدل چې خلک په خیمو یا د شنه اسمان لاندې پناه واخلي، پښتنې ښځې، ماشومان او مشران له یوه بل ستر انساني ناورین سره مخ دي».
د پښتون ژغورنې غورځنګ یا پيټياېم مشر منظور پښتین د پوښتنې په توګه مطرح کوي، دا حقیقت باید روښانه شي، چې د ډېورنډ کرښې په اوږدو کې د ۸۵۰پوځي کلاګانو، زرګونو چکپاینټونو او په هر غره کې د وسلهوالو پوځي پوستو د سترګو مخې ته د «شاهي مېلمنو» په توګه د ټيټيپي، ټيټيجي، جماعتالاحرار، داعش په څېر وسلهوالې ډلې څنګه تر دې سیمو ورسېدې؟
منظور پښتین زیاتوي: «دغو وسلهوالو ملېشو ته روزنه تاسو [د پاکستان پوځ] ورکړې، همدغه ډلې تاسو جوړې کړي او اوس بیا د همدې ډلو د مخالفت په نوم د پښتنو کورونه ورانوئ او ژوند یې تباه کوئ».
د پيټياېم مشر د خېبرپښتونخوا پرچارواکو هم نیوکې کوي او وايي، د عملیاتو پر ضد د مخالفت په تړاو یوازې خبرې بسنه نهکوي باید په عمل کې ثابت کړي.
پښتین وايي: «د صوبایي حکومت دا خبره چې [موږ به عملیاتو ته اجازه ورنهکړو] بسنه نهکوي. که دوی رښتیا وایي، نو باید هماغسې عملي مقاومت وکړي لکه څنګه چې د خپلو بندیانو [عمران خان] لپاره کوي».
نوموړی د خېبرپښتونخوا د چارواکو د بیان او عمل تر منځ توپیر ته په اشارې وايي: «که د پښتنو وینه او اوښکې وي، یوازې بیان ورکول کېږي، خو که د ګوند د بندیانو خبره وي، جلسې کېږي، لاریونونه کېږي، لارې بندېږي، اسلاماباد ته لانګ مارچونه کېږي، د زندانونو مخې ته شپې سبا کېږي او عدالتونو ته مقدمې وړل کېږي. دا عملي سیاست دی».
د خېبرپښتونخوا چارواکي تل وايي، په عملیاتو کې د دوی رایه شامله نهده او پوځ په خپله پرېکړه کوي او عملي کوي یې، خو منظور پښتین بیا وايي: «ښه دا مو ومنله چې پوځ یې کوي، خو لکه څنګه چې د تاسو بندیان هم د تاسو په خوښه بندیان نهدي او بیا هم تاسې د هغوی لپاره عملي مبارزه کوئ، همداسې لږ تر لږه پنځه سلنه عملي مقاومت د پښتنو پر وړاندې د ظلم او د عملیاتو پر ضد هم وکړئ».
د پښتون ژغورنې غورځنګ همداراز څرګنده کړې، که همدا نن د خېبرپښتونخوا د اعلی وزیر په ګډون ټوله کابینه په تیرا کې احتجاجي پرلت وکړي، نو د دغو پوځي جنرالانو ظلمونه او ناوړه پلانونه به د نړۍ پر وړاندې بربنډ شي او نړۍ ته به هم روښانه شي چې پوځ څنګه د خلکو د منتخبو حکومتونو د پرېکړو پر ضد، په زور سره په لکونو پښتانه «تباه او بېکوره»کوي.
د نوموړي په وینا، دغه چاره به نهیوازې د عملیاتو لارې وتړي، بلکې د ولسواکۍ لپاره پر پوځ د نړۍ له ګوټ ګوټ څخه فشارونه هم زیات شي او په باور یې، نور سیاسي ګوندونه دا «ظلم» یوازې د سیاسي فرصت په توګه کاروي، یعنې یوازې پر صوبایي حکومت نیوکه کوي، خو د مظلومو پښتنو لپاره عملي ګام نهاخلي او ان د پوځ د روانو ظلمونو پر ضد رښتینی مقاومتي دریځ هم نهنیسي.
منظور پښتین په ډاګه کړې: «اوس په دې سخته یخنۍ کې پنجابي جنرالانو پښتانه ماشومان، ښځې او مشران له خپلو کورونو اېستلي دي. د هغوی ویډیوګانې او انځورونه چې سړی ویني، نو انسان د خپل قوم او وطن پر بېوسۍ او ناوړه حالت اندېښمن شي».
پښتین همداراز څرګنده کړې: «موږ په زړه کې یوازې یوه هیله لرو، خدای دې وکړي چې پښتون قوم دا هر څه هېر نهکړي. نور چې وخت یې راشي، موږ به خپله دوښمن ته دا هر څه ور په یاد کړو».
له دې سره سم، د خېبرپښتونخوا د تیرا درې په زوره اېستل کېدونکې کورنۍ د بېځایه شویو کورنیو د نوملیکنې په مرکزونو کې د خراب مدیریت او باړې ښار ته پر تلونکې لاره د امنیتي پوستو له اوږدو او ستومانوونکو ځنډونو شکایت لري.
بېځایه شویو کورنیو ویلي، له تیرا څخه تر باړې بازار پورې له سلو کیلومترو زیات اوږد او ستړي سفرونه کوي چې په دې لاره کې ښځې، ماشومان او عمر خوړلي کسان تر ټولو ډېر له ستونزو سره مخ کېږي.
ډېری بېځایه شویو خبرداری ورکړی، که چېرې تخلیه په همدې ناوړه شرایطو کې دوام وکړي، نو دا به یو ستر انساني ناورین رامنځته کړي.
ځینو بېځایه شویو کورنیو بیا ادعا کړې، چې په خپلو سیمو کې فعالو ناقانونه وسلهوالو سلګونه کورنۍ په عملي توګه یرغمل کړي او د وسایطو په جبري درولو سره یې خلک اړ کړي، چې په خپلو کورونو کې پاتې شي. د دوی په وینا، د پاکستان امنیتي ادارې د تیرا بېلابېلو سیمو ته د خوړو او نورو اړینو توکو د لېږد اجازه نهورکوي، تر څو خلک اړ شي ژر تر ژره سیمه پرېږدي.