افغانستان لپاره د روسیې د ولسمشر ځانګړي استازي ضمیر کابلوف ویلي: «په ۲۰۲۶کال کې د افغانستان په اړه نړۍوالې غونډې لاتر اوسه نهدي پلان شوې». هغه د روسیې دولتي خبري اژانس تاس ته د یوې پوښتنې په ځواب کې وویل، «موږ لاتر اوسه کوم څه نهدي پلان کړي».
د ښاغلي کابلوف څرګندونې په داسې حال کې دي، چې په ۲۰۲۵کال کې په تهران کې د افغانستان د ګاونډیو هېوادونو د ځانګړو استازو په کچه غونډه وشوه او د روسیې استازي هم پهکې ګډون لاره.سربېره پر دې روسیه هرکال د افغانستان په اړه د مسکو فارمټ غونډې کوربهتوب کوي، چې په روان کال کې یې د جوړېدو څرنګوالی لاروښانه نهدی. روسیه یوازینی هېواد دی، چې د طالبانو اداره یې په رسمیت پېژندلې ده.ضمیر کابلوف د خپلې وینا په یوې بله برخه کې وویل، چې روسیې او امریکا لاتر اوسه د افغانستان په اړه مستقیمې خبرې نهدي کړې. هغه وويل: «هېڅ خبرې اترې نهدي شوې».د افغانستان لپاره د روسیې د ولسمشر استازي د ۲۰۲۳کال په ډسمبر کې ویلي و، چې د مسکو او واشنګټن ترمنځ د اړیکو هیڅ چینل نهدی پاتې.د روسیې د ولسمشر ځانګړي استازي له تاس سره په مرکه کې زیاته کړې، چې د افغانستان بانکي سیسټم اوسمهال د «میر» په نوم د روسیې د تادیې کارتونو د منلو توان نهلري.هغه په افغانستان کې د روسيې میر کارتونو د کارولو امکاناتو په اړه د یوې پوښتنې په ځواب کې وویل: «زه فکر نهکوم، چې دا به دومره ژر وشي ځکه چې د افغانستان بانکي سیسټم معاملې نه پروسس کوي. دوی هم تر بندیزونو لاندې دي».په مسکو کې د طالبانو سفیر ګل حسن تر دې وړاندې ویلي و، چې د طالبانو اداره له روسیې سره د بانکي همکارۍ په اړه خبرې اترې کوي. هغه وويل، چې د طالبانو اداره د روسيې «میر بانکي کارتونو» کارولو په اړه د خبرو په حال کې ده.ضمیر کابلوف د سیمې د اوسني بېثباته وضعیت او پر هغې د طالبانو د احتمالي نفوذ په اړه د یوې پوښتنې په ځواب کې وویل، «دوی نهشي کولی چې اغېزه پرې وکړي».
