په ننګرهار کې د طالبانو امنیې قوماندانۍ خبر ورکړی، چې د جلالاباد ښار په مرکز کې یې د رېکشاوو پر تګ راتګ بندیز لګولی. یادې قوماندانۍ ویلي، د تازه پرېکړې له مخې رېکشاوې نهشي کولی د جندرما، کرنې ریاست، د چپرهار زړې هډې او د چشمه خانجي له څلورلارې څخه د ښار مرکزي سیمو ته داخل شي.
په ننګرهار کې د طالبانو امنیه قوماندانۍ د چهارشنبې په ورځ (د مرغومي ۲۴مه) د یوې خبرپاڼې په خپرولو سره ویلي، په هغو سیمو کې چې رېکشاوې بندې شوې دي، د ښاریانو د لېږد رالېږد لپاره کاسټر موټرونه په کار اچول شوي دي.
تر دې وړاندې طالبانو د روانې میاشتې په لومړیو کې په هرات ولایت کې هم د رېکشاوو پر تګ راتګ بندیز لګولی و. ورته مهال د هرات یو اوسېدونکي د رېکشاوو د بندیز په اړه نیوکه کړې او ویلي یې دي، چې د ګاڼو او ګران بیه توکو په پلورلو سره یې ځان ته د کار لپاره رېکشا پېرلې وې؛ خو طالبانو اوس پرې بندیز لګولی.
نوموړي زیاته کړې، په داسې حال کې چې خلک له بېکارۍ سره مخ دي؛ طالبان د خلکو د کار او روزګار مخه نیسي.
