د امریکا د بهرنیو چارو وزارت یوه یادښت له مخې د ټرمپ حکومت د افغانستان، ایران، وینزویلا او روسیې په ګډون د ۷۵ هېوادونو د وګړو لپاره د ویزو د صادرولو پروسه ځنډوي. دغه اقدام له دې امله شوی، چې ددغو هېوادونو وګړي ښايي د امریکا په عامه مرستو او ټولنیزو پروګرامونو اتکا وکړي.
د فاکس نیور د رپوټ له مخې، د یاد یادښت له مخې، سفارتونو او کونسلګریو ته امر شوی چې د جنورۍ له ۲۱مې نېټې وروسته د ویزو اړوند پرېکړې ودرول شي، څو د کډوالۍ د موجوده قوانینو پر بنسټ د ارزونې بهیر له سره وکتل شي.
په هغو هېوادونو کې چې دا ځنډ پرې عملي کېږي، سومالیا، روسیه، افغانستان، برازیل، ایران، عراق، مصر، نایجیریا، تایلنډ او یمن شامل دي.
دا پرېکړه د «عامه لګښت» د اصولو د سختې څارنې په لړ کې شوې او د ولسمشر ډونالډ ټرمپ د ادارې د کډوالۍ د پالیسۍ د پراخو بدلونونو یوه برخه بلل کېږي.
دغه اقدام د هغو هېوادونو د وګړو لپاره کېږي چې ښايي د امریکا پر عامه مرستو او ټولنیزو پروګرامونو د اتکا له لارې ژوند وکړي. د سومالیا وګړي د دې اقداماتو په مرکز کې دي.
د امریکا د بهرنیو چارو وزارت د نومبر په میاشت کې ټولو سفارتونو ته لارښوونه کړې وه چې د کډوالۍ د قانون د «عامه مرستې» مادې له مخې د ویزو د ارزونې نوي معیارونه عملي کړي.
په ارزونه کې به د روغتیا، عمر، د انګلیسي ژبې مهارت، مالي وضعیت او حتا د اوږدمهاله طبي پاملرنې اړتیا هم په پام کې ونیول شي.
زاړه یا ډیر وزن لرونکي غوښتونکي او هغه کسان چې مخکې یې د حکومت له مالي مرستو یا موسسو ګټه اخیستې وي، هم د ویزې د رد کېدو لاندې راځي.
