د طالبانو د کورنیو چارو وزارت د دوو جلا خبرپاڼو په خپرولو سره خبر ورکړی، چې په ننګرهار او غزني ولایتونو کې یې ۳۴ کسان د نشهیي توکو د قاچاق او پلور په تړاو نیولي دي.
د یاد وزارت په لومړۍ خبرپاڼه کې راغلي، چې په ننګرهار کې یې د وروستیو اوو ورځو راهیسې ۳۰کسان د نشهيي توکو د قاچاق او پلور په تړاو نیولي دي. خبرپاڼه زیاتوي، له نیول شویو کسانو ۱۷ کیلوګرامه چرس، څه باندې ۶زره نشهيي ټابلیټونه او یوه اندازه شیشه او هیرویین ترلاسه شوي دي.
د دغه وزارت په دویمې خبرپاڼه کې راغلي، چې په غزني ولایت کې یې د یو لړ عملیاتو پرمهال څلور کسان د ۵۰ کیلو ګرامه شیشې، هیرویینو او چرسو د قاچاق په تړاو نیولي دي. د خبرپاڼې له مخې؛ له لومړنیو څېړنو وروسته به دغه کسان عدلي او قضایي بنسټونو ته وسپاري.
