د طالبانو د فاریاب ولایت امنیه قوماندانۍ د دغه ولایت د ولسوالیو پر قوماندانيو او د جزوتامونو اړوندو قطعاتو ۱۰۰ موټرسايکلونه ووېشل. د طالبانو د کورنیو چارو وزارت وايي، چې دغه موټر سایکل د ګزمو د اسانتیا او د پېښو پر وړاندې د چټک غبرګون په موخه وېشل شوي.
د طالبانو د کورنیو چارو وزارت د پنجشنبې په ورځ د یوې خبرپاڼې په خپرولو سره ویلي چې د امنیه قومندانۍ مسوولینو ویلي، یاد موټرسايکلونه د امنیتي ځواکونو د تحرک د لوړولو، د ګزمو د اسانتیا او په بېلابېلو سیمو کې د جنايي او امنیتي پېښو پر وړاندې د چټک او پر وخت رسېدنې په موخه چمتو شوي دي.
د پاکستان د بهرنیو چارو وزارت وایي چې د هند او افغانستان ترمنځ اړیکې د دواړو هېوادونو خپلمنځي موضوع ده او هغوی کولای شي خپلې ډیپلوماتیکې اړیکې لا پراخې کړي.
د یاد وزارت ویاند طاهر اندرابي د پنجشنبې په ورځ، د اونيزې خبري ناستې پر مهال د یوې پوښتنې په ځواب کې وویل، چې پاکستان د هند او افغانستان اړیکې چې د پاکستان ضد وسله والو د ملاتړ په اړه نه وي، د خپل هېواد په زیان نه ویني.
د پاکستان د بهرنیو چارو وزارت ویاند همدارنګه وویل چې پاکستان له افغانستان سره د خپلو اړیکو په اړه خپل دریځ روښانه کړی او لا هم د کابل له لوري د مثبتو پیغامونو او نښو هیله لري.
د هغه په وینا، پاکستان د لیکلو او د تایید وړ تضمینونو غوښتنه کوي او دا غوښتنه لا هم له افغان چارواکو سره پر مېز پرته ده.
ویاند زیاته کړه چې پاکستان له افغانستان سره د اړیکو د ښه کېدو غوښتونکی دی او تمه لري چې افغان لوری به د امنیتي اندېښنو په اړه عملي او باوري ګامونه پورته کړي.
د طالبانو ویاند ددې ډلې په لیکو کې د اختلاف په اړه ویلي، چې دغه ادعاوې حقیقت نه لري. هغه ټینګار کړی چې د دوی په اداره کې ټول فعالیتونه د اسلامي شریعت له مخې کېږي او د اختلاف لپاره هیڅ ځای نشته.
ذبیح الله مجاهد زیاته کړې، چې «د مشرانو له خوا د اتحاد او اتفاق په اهمیت خبرې کول یا هغه واړه موضوعات چې نظرونه پکې متفاوت وي، دا هېڅکله د اختلاف معنا نه لري».
هغه زیاته کړې چې د دوی په لیکو کې کلک وحدت، اطاعت او یووالی شته او د اختلاف هېڅ ویره نشته.
بي بي سي په یوه رپوټ کې ویلي، چې د طالبانو په لیکو کې پر مختلفو مسایلو اختلاف دی.
په تېر یوه کال کې افغانستان انټرنشنل د مختلفو باوري سرچینو، اسنادو او غږیزو کلیپونو له لارې د طالبانو ترمنځ د اختلافاتو په اړه ځانګړي رپوټونه ور کړي وو، خو طالبان معمولا په خپلو لیکو د اختلاف خبرونه ردوي.
د امریکا د کانګرس د بهرنیو چارو کمېټې لوړپوړي غړي ګریګوري ډبلیو. میکس د چارشنبې په ورځ څرګنده کړه چې د بهرنیو چارو وزارت خبر ور کړی چې غواړي په قطر کې د افغانانو «السیلیه» کمپ وتړي. نوموړي دا پرېکړه غندلې ده.
دغه کمپ د هغو افغانانو د خوندي انتقال ملاتړ کوي چې د امریکا له خوا یې ارزونه شوې او د طالبانو له ځورونې په تېښته کې هلته ځای پرځای شوي دي.
میکس وویل، چې « السیلیه کمپ د هغو افغان همکارانو لپاره چې د امریکا د ځواکونو او ډیپلوماټانو ترڅنګ یې خپل ژوند په خطر کې اچولی، حیاتي ځای و. د دې کمپ تړل د ټرمپ د ادارې وروستی بې غوره ګام دی چې زموږ د دې همکارانو د خوندي انتقال ټولې لارې تړي».
نوموړي ویلي، دا له هغو کسانو سره لوی خیانت او د ژمنې خلاف عمل دی چې په افغانستان کې له امریکایانو سره ولاړ وو.
هغه زیاته کړه، « جمهوري غوښتونکو کلونه داسې څرګندوله، چې امریکا د هغو افغانانو په تړاو اخلاقي مکلفیت لري، چې زموږ د ماموریت ملاتړ یې کړی، خو اوس د ولسمشر ټرمپ په دوره کې، دغه غږونه یا غلي دي او یا هم د ادارې د اقداماتو برخه شوي چې زموږ پر همکارانو د دروازې تړلو لامل کېږي».
میکس له حکومت نه وغوښتل چې د افغانانو لپاره د مهاجرت د ځانګړو ویزو پروسه بیا پيل کړي، د امریکا د کډوالو د منلو پروګرام پرانیزي او باوري کړي چې په یاد کمپ کې هېڅ افغان په زور افغانستان یا بل هېواد ته ونه لېږل شي.
هغه ټینګار وکړ چې امریکا باید خپلو ژمنو ته وفاداره پاتې شي او له هغو کسانو سره مرسته وکړي چې د شلو کلونو جګړې په بهیر کې یې د امریکا د ماموریت ملاتړ کړی دی.
السیلیه کمپ د قطر په الريان ولسوالۍ کې پروت دی او له۲۰۰۰ کال راهیسې د امریکا لپاره یوه مهمه لوژستیکي اډه وه چې د افغانستان او عراق عملیاتو لپاره تجهیزات او ملاتړ ترې برابرېده.
له افغانستان نه د امریکایي ځواکونو تر وتلو وروسته، په دې اډه کې زرګونه افغان کډوال او د هغوی کورنۍ ځای پرځای شوې، چې له دې ځایه وروسته متحده ایالاتو او نورو هېوادونو ته ولیږدیږي.
د طالبانو د کورنیو چارو وزارت مرستیال محمدنبي عمري وايي، نړۍ دا هڅه کوي چې د طالبانو نظام او حکومت ونړوي. عمري دغه راز ویلي، چې که طالبان دا ومني چې په بګرام اډه کې دې بهرني ځواکونه وي، بیا له دوی سره هېڅ ستونزه نشته او «محترم» دي.
عمري د پنجشنبې په ورځ یوې غونډې ته په وینا کې وویل، چې نړۍ هڅه کوي د طالبانو حکومت او نظام ونړوي او دده به وینا، «یوه بله یهودي او نصراني ډیموکراسي» او یوبل څه په هېواد کې واکمن شي.
نوموړي ددغسې بدلون احتمال رد نه کړ او ددې لپاره یې په ۲۰۰۱ کال کې پر طالبانو د امریکا د برید موضوع ته اشاره وکړه، خو ویې ویل، چې په دغسې حالاتو کې خلک باید دین او مدرسې پرې نه ږدي او نه هم کور په کور جاسوسۍ وکړي.
عمري زیاته کړه، « هغه خلک چې دا خوبونه ویني، که خدای مقدره کړې وه او خدای ناخواسته دا خوبونه یې رښتیا کېدل، دا خپل دین او مدرسه مه پریږده، کور په کور جاسوس او دښمن مه جوړېږه».
نوموړي په خپلو خبرو کې وویل، چې ددوی اداره د دښمنانو توطیو ته ځیره ده او پر خلکو یې هم غږ وکړ، چې که دغسې څه ویني، له دوی سره یې شریک کړي.
نوموړي زیاته کړه، « ددښمنانو دسیسو ته متوجې شئ، امارت متوجې دی، ولسه ته هم متوجه شه، ستا توجه دا ده، چې که چیرې بد خبر او پلان دې لیده، له تطبیق مخکې مسوولانو ته خبر ور کوئ».
هغه په خپلو خبرو کې ددغسې پلان احتمال هم رد کړ او ویې ویلو چې « که ددوی په کړنو او غوښتنو وای، نو دا نظام به یوه میاشت هم نه وای چلیدلای».
د عمري په وینا، له دوی سره د نړۍ دښمني یوازې د دین، استقلال او ازادۍ له امله ده.
هغه زیاته کړې چې له نړۍ سره بله هېڅ ستونزه نه لري.
د طالبانو د کورنیو چارو وزارت مرستیال دغه راز وویل، چې که دوی دا ومني چې بګرام اډه کې دې بهرني ځواکونه وي بیا له دوی سره هېڅ ستونزه نشته. هغه وویل:«بیا د دنیا دښمني له موږ سره نشته، بیا له هرچا نه نړۍ ته موږ محترم یو».
هغه زیاته کړه: «که چیرې موږ معتدل مسلمانان جوړ شو، بیا هېڅ ستونزه نشته».
عمري له ولسونو وغوښتل چې خپلې غوښتنې د طالبانو له مسوولینو سره شریکې کړي.
د هغه په وینا داد حکومت مسوولیت دی، چې د خلکو روا او منطقي غوښتنو ته رسيدنه وکړي.
دا په داسې حال کې ده، چې طالبان د نړیوالې ټولنې د غوښتنو په عملي کولو کې پاتې راغلي.
د طالبانو حکومت کې افغانستان په تېرو څلورو کلونو کې د ډېموکراټیکو او مدني بنسټونو د انحلال، د اساسي ازادیو د سخت محدودیت، د ښځو، زیانمنو او محرومو ډلو پر وړاندې د سیستماتیکې ځپنې او تبعیض او له اساسي خدماتو لکه زده کړو، روغتیا او عدالت ته په پراخه کچه لاسرسي نه د خلکو د محرومیت شاهد و.
طالبانو په ډیلي کې د افغانستان د سفارت چارې عملا په واک کې اخېستې دي او په همدې لړ کې ددې ډلې سرپرست سفیر مفتي نور احمد نور په یاد سفارت کې له یو شمېر هندمیشتو افغان سوداګرو سره لیدلي دي.
مفتي نور احمد نور د خپلې دندې له پیل وروسته د پنجشنبې په ورځ، د مرغومې پر۲۵مه، په هند کې له مېشتو افغان سوداګرو سره وکتل.
په دې ناسته کې افغان سوداګرو په هند کې د خپلو سوداګریزو فعالیتونو، ویزو، بانکي ستونزو، اسنادو او د سوداګرۍ پر وړاندې پرتو خنډونو په اړه خبرې وکړې او خپلې ستونزې یې د طالبانو له سفیر سره شریکې کړې.
یاد سفارت ویلي، چې د طالبانو نوي سفیر افغان سوداګرو ته ډاډ ورکړی چې د دوی د ستونزو حل د سفارت له مهمو لومړیتوبونو څخه دی. هغه زیاته کړې چې د هند د حکومت له اړوندو ادارو سره به په همغږۍ کې د افغان سوداګرو د قانوني او اقتصادي ستونزو د حل لپاره جدي هڅې وکړي.
طالبانو د روانې اونۍ په اوږدو کې اعلان وکړ، چې نوي ډیلي ته یې نوراحمد نور د نوي سفیر په توګه استولی دی.
نور تر دې وړاندې د طالبانو د بهرنیو چارو وزارت د سیاسي چارو د لومړي رییس په توګه دنده ترسره کوله.
سره له دې چې هند تر اوسه طالبان په رسميت نه دي پېژندلي، خو په وروستیو میاشتو کې د دواړو لوریو ترمنځ ډيپلوماتیکې اړیکې او اقتصادي همکارۍ ډېرې شوې دي.