په بلخ ولایت کې د ۱۹ مېلیونه افغانیو په لګښت د چرګوړو د تولید یوه کارخونه پرانیستل شوه. د یادې فابریکې څښتن بسمالله ویلي، چې دغه کارخونه کې به په اونۍ کې ۹۰زره چورګوړي تولید او بازار ته وړاندې شي.
افغانستان ته تر ډېره چرګان او چرګوړي له ایران او پاکستان نه واردېږي. تر دې وړاندې د ایران د تایباد ولسوال حسین جمشیدي خبر ورکړی و، چې په روان لمریز کال کې تر ۱.۲ مېلیونه ډېر چرګان او چرګوړي افغانستان ته صادر شوي چې دغه اندازه د تېرکال پرتله دوه برابره ده. هغه وایي، د روان کال په لومړۍ نیمايي کې افغانستان ته د ۱۲۰۰ مېلیارډه ریالو په ارزښت چرګان صادر شوي.
ورته مهال د طالبانو د کرنې، اوبو لګولو او مالدارۍ وزارت وایي، په هرات ولایت کې د چرګانو صنعت د پام وړ وده کړې ده چې اوسمهال هره ورځ ۲.۵ مېلیونه هګۍ پهکې تولیدېږي. د دغه وزارت په وینا؛ په هرات کې د هګیو، غوښې او د چرګانو په تولید کې له ۱۲۰ مېلیون ډالرو څخه ډېره پانګونه شوې ده.
