د افغانستان د سوداګرۍ او پانګونې خونې پنجشنبه د (مرغومې ۲۵مه) خبر ورکړی، چې مشرتابه یې په کابل کې له یو شمېر هندي پانګهوال سره ناسته کړې ده. په دې ناسته کې د پانګونې پر فرصتونو په ځانګړي ډول د روغتیا او درملو په سکټور کې پر پانګونې خبرې شوې دي.
تر دې وړاندې هم یو شمېر هندي پانګهوالو لېوالتیا ښودلې وه، چې په افغانستان کې به د درملو د تولید کارخونو په برخه کې پانګونه کوي؛ خو لا په عملي توګه د دغو هڅو کوم څرک نه دی لیدلی شوی. هممهاله د طالبانو د ریاست الوزرا اقتصادي مرستیال ملا عبدالغني برادر په افغانستان کې له پاکستان څخه د درملو واردوونکو شرکتونو ته خبرداری ورکړی، چې له یاد هېواد سره په دې برخه کې خپلې اړیکې پرې کړي.
هغه ویلي وو، د پاکستاني درملو کیفیت خورا کمزوری دی او باید د ۳میاشتو په اوږدو کې ټول واردوونکي افغان شرکتونه له پاکستاني لوریو سره خپلې معاملې تصفیه کړي او د درملو واردولو لپاره دې پر بدیلو لارو چارو باندې فکر وکړي. د درملو واردونکي شرکتونه وایي، په ناڅاپي توګه د طالبانو دغه پرېکړې له سختو ننګونو سره مخ کړي او نهشي کولای چې ارزانه بدیلې لارې ژر ومومي.
د طالبانو له دې پرېکړې سره د افغانستان په بېلابېلو ولایتونو کې خلک د درملو له کمښت سره مخ شوي او همداراز په بیو کې یې هم د پام وړ لوړوالی راغلی دی.
