په کندهار کې د سمنټو د تولید فابریکې چارې ۹۰سلنه بشپړې شوې دي
په کندهار ولایت کې د سمنټو د یوې تولیدي فابریکې د جوړېدو چارې ۹۰ سلنه بشپړې شوې دي او ټاکل شوې ده، چې دغه فابریکه به ډېر ژر ګټې اخیستنې ته وسپارل شي.
په کندهار ولایت کې د سمنټو د یوې تولیدي فابریکې د جوړېدو چارې ۹۰ سلنه بشپړې شوې دي او ټاکل شوې ده، چې دغه فابریکه به ډېر ژر ګټې اخیستنې ته وسپارل شي.
د طالبانو اړوندې رسنۍ د راپور له مخې؛ د یادې پروژې چارې د «احمد نبيزاده» په نوم شرکت له لوري د ۱۵۰مېلیونه ډالرو په پانګونې سره نږدې پای ته رسېدلې دي. د پروژې د مسوولینو په وینا؛ دغه فابریکه په دوو پړاوونو (فازونو) کې جوړېږي.
د لومړي پړاو تولیدي ظرفیت ۱،۵۰۰ ټنه دی، چې نږدې ۹۰ سلنه چارې یې بشپړې شوې دي. دویم پړاو چې تولیدي ظرفیت یې ۳،۵۰۰ ټنه دی، د لومړي پړاو تر بشپړېدو وروسته به پیل شي چې په ټولیز ډول به د فابریکې د تولید ظرفیت ۵،۰۰۰ ټنو ته ورسېږي.
د یادې فابریکې انجینران وایي، د دغه فابریکې تولیدات د نړۍوالو معیارونو سره برابر دي او د تولیدېدونکو سمنټو کیفیت به د وارداتي سمنټو پرتله لوړ او بیه به یې مناسبه وي. د راپور له مخې؛ دا مهال په دغه فابریکه کې شاوخوا ۷۰۰ کسان په بېلابېلو برخو کې پر کار بوخت دي.
اوسمهال افغانستان د خپل اړتیا وړ سمنټ له ایران او پاکستان څخه واردوي. له بل پلوه ایراني چارواکي وایي، د دوغارون او اسلامکلا له لارې هر کال شاوخوا ۴زره ټنه د تربتجام سمنټ افغانستان ته صادرېږي.
