د ایران د اعتراضونو په اړه د ملګرو ملتونو د امنیت شورا غونډه پیل شوه

د ایران د اعتراضونو او د معترضانو د وژنو د څېړنې لپاره د ملګرو ملتونو د امنیت شورا غونډه د پنجشنبې په ماښام (د مرغومي ۲۵مه) پیل شوه.
د ملګرو ملتونو د عمومي منشي د دفتر مرستیال په دې غونډه کې وویل، چې په اعتراضونو کې د ازادۍ شعارونه ورکړل شوي او د پاچاهۍ د بېرته راستنیدو غوښتنه شوې ده.
هغه همدارنګه وویل: «اټکل کېږي چې په اعتراضونو کې له ۱۸ زرو څخه ډېر کسان نیول شوي دي. اعتراضونه په ایران کې روان دي».
د ملګرو ملتونو دغه چارواکي په دوام کې غوښتنه وکړه، چې له هر هغه اقدام څخه ډډه وشي چې په سیمه کې کړکېچونه زیاتوي.
دغه غونډه د متحده ایالاتو د غوښتنې پر بنسټ او د شورا د ټولو ۱۵ غړو په ګډون جوړه شوې ده.
