د ګرینلنډ پر سر کړکېچ؛ ایټالیا د ناټو د ګډ حضور غوښتنه وکړه

په داسې حال چې د ګرینلنډ پر سر د لوېدیځو متحدینو ترمنځ کړکېچونه زیات شوي د ایټالیا لومړۍ وزیرې جورجیا میلوني له ناټو وغوښتل چې د شمالي قطب سیمه (ارکټیک)کې «یو همغږی حضور» رامنځته کړي، څو د تاوتریخوالي مخه ونیول شي او د «نورو لوریو د لاسوهنې» په ترڅ کې دې غبرګون وښودل شي.
په هغه لیک کې چې د ارکټیک په اړه د ایټالیا د حکومت د پالیسۍ د سند د وړاندې کولو پر مهال ولوستل شو، میلوني وویل چې دا سیمه د نوو سمندري لارو د پراختیا او د خپلو سترو «انرژۍ او معدني سرچینو» له امله ورځ تر بلې ډېر اهمیت پیدا کوي.
ایټالیا له ۲۰۱۳ کال راهیسې د ارکټیک شورا کې، چې د سیمې څارنه کوي، د ناظر حیثیت لري او د ګرینلنډ پر سر د امریکا او ډنمارک د وروستیو کړکېچونو له امله یې خپله پالیسي نوې کړې ده، هغه کړکېچونه چې پر سیمې یې پام لا زیات کړی دی.
د امریکا ولسمشر ډونالډ ټرمپ یو ځل بیا د دې غوښتنه کړې چې امریکا باید د ګرینلنډ کنټرول په لاس کې واخلي، څو روسیه یا چین یې اشغال نه کړي. خو دا ټاپو، چې د ډنمارک یو نیمه خپلواک قلمرو دی، په همدې اونۍ کې په واشنګټن کې په شویو خبرو کې دا نظر رد کړ، چې د دواړو لوریو ترمنځ یې «بنسټیز» اختلافات ښکاره کړل.
