په داسې حال کې چې پر افغانستان د طالبانو له بیا واکمنېدو راهیسې یادې ډلې پر ښځو او نجونو پراخ بندیزونه لګولي؛ په خوست کې د طالبانو د والي ویاند مستغفر ګربز ویلي، چې د یادې ډلې له واکمنۍ راهیسې په دغه ولایت کې ۱۵۰ مېرمنې له کورني تاوتریخوالي او جبري ودونو ژغورل شوې دي.
نوموړي ادعا کړې، چې د امر بالمعروف محتسبینو په دغه ولایت کې ۱۵۰مېرمنې له کورني تاوتریخوالي ژغورلې دي او دغه لړۍ به لاهم دوام ولري. په افغانستان کې واک ته د طالبانو له بیا ستنېدو وروسته دغې ډلې ښځې له زدهکړو، کار او تګ راتګ منعه کړې دي.
که څه هم د ښځو پر وړاندي د طالبانو توند چلند په کور دننه او بهر له سختو نیوکو سره مخ شوی او په وار-وار له دغه ډلې غوښتنه شوې، چې د افغان مېرمنو په وړاندې دې په خپلې پالیسۍ کې له نرمښت کار واخلي؛ خودا هغه غوښتنې دي چې طالبانو له پامه غورځولې دي.
