د اوکراین ولسمشر ولادیمیر زېلېنسکي ویلي، چې یو لوړپوړی اوکرایني پلاوی د امریکا لهخوا د امنیتي تضمینونو او د جګړې وروسته د بیارغونې د مالي مرستو په اړه د خبرو لپاره امریکا ته روان شوی.
نوموړي هیله څرګنده کړې، چې د یادو تضمینونو په اړه اسناد به راتلونکې اوونۍ د نړۍوال اقتصادي فورم په څنډه کې په داووس کې لاسلیک شي.
زېلېنسکي په کییف کې د چک د ولسمشر پېټر پاول سره په یوه ګډ خبري کنفرانس کې ویلي، چې اوکراین هیله لري د نږدې څلور کلنې جګړې د پای ته رسولو لپاره د روسیې د دریځ په اړه له امریکا څخه وضاحت ترلاسه کړي.
نوموړي زیاته کړې: «زه فکر کوم موږ له امریکايي لوري ښه کار کړی دی، یوازې په ځینو مسایلو کې زموږ نظرونه له یو بل سره توپیر لري».
امریکا ته په روان شوي پلاوي کې د زېلېنسکي د دفتر رییس کېریلو بودانوف، د ملي امنیت او دفاع شورا مرستیال رستم عمروف او د زېلېنسکي د پارلماني ډلې مشر ډاویډ اراخامیا شامل دي.
