د امریکا د خزانې وزارت: د امریکا وروستي بندیزونه د حوثیانو د تمویل شبکې په نښه کوي

د ټرمپ حکومت د جمعې په ورځ تازه بندیزونه اعلان کړل، چې موخه یې په یمن کې د ایران له ملاتړ څخه برخمن حوثیان او د تېلو محصولاتو، وسلو او نورو هغو تجهیزاتو لېږد دی، چې د «دوهګوني استعمال» په نوم یادېږي او د حکومت په وینا د دې ډلې د تمویل لپاره کارېږي.
د امریکا د خزانې وزارت د بهرنیو شتمنیو د کنټرول دفتر ویلي، چې دا اقدام ۲۱ کسان او بنسټونه او همدارنګه یوه بېړۍ په نښه کوي. په دې کې په یمن، عمان او متحده عربي اماراتو کې ځینې ادعا شوي پوښښي شرکتونه هم شامل دي.
د امریکا د خزانې وزیر سکاټ بېسنټ ویلي: «حوثیان د ترهګریزو کړنو په ترسره کولو او د سره سمندر له لارې د تېرېدونکو سوداګریزو بېړیو په بریدونو سره د امریکا لپاره ګواښ جوړوي».
یاد وزارت زیاته کړې، چې دا ګام د خزانې وزارت د پخوانیو اقداماتو دوام دی، څو د حوثیانو پر هغو «سترو عایداتي او قاچاقي شبکو» فشار واچوي، چې دې ډلې ته د سیمې د بېثباته کوونکو فعالیتونو د دوام وړتیا ورکوي، په ځانګړي ډول د سره سمندر بریدونه.
له ۲۰۲۳ کال راهیسې حوثیانو په سره سمندر کې پر ګڼو بېړیو بریدونه کړي، چې د دوی په وینا له اسراییل سره تړاو لري او دا کار یې د غزې پر وړاندې د اسراییل د جګړې له امله له فلسطینیانو سره د خواخوږۍ په توګه بللی دی.
همدا راز، د اسراییل لهخوا د ایران پر نیابتي ډلو د بریدونو له امله د تهران سیمهییز نفوذ کمزوری شوی، چې دې کې په یمن کې پر حوثیانو بریدونه هم شامل دي.
