په متحده عربي اماراتو کې د طالبانو تر واک لاندې د افغانستان سفارت وايي، چې د یادې ډلې سفیر بدر الدین حقاني په دغه هېواد کې له مېشتو یو شمېر مخورو او سوداګرو افغانانو سره په لیدنه کې ډاډ ورکړی، چې د سوداګرۍ په برخه کې د دوی ستونزې به حل کړي.
په متحده عربي اماراتو کې د طالبانو سفارت نن جمعه، د مرغومي ۲۶مه پر اېکس خواله رسنۍ لیکلي، په دې لیدنه کې افغانانو یو لړ سوداګریزې ستونزې مطرح او په اماراتو کې یې د افغان کارګرو د حقونو پالنې او ملاتړ په موخه له سفارت د ځانگړې پاملرنې غوښتنه وکړه.
د طالبانو سفیر بدر الدین حقاني ویلی، چې په اماراتو کې د افغانانو خدمت او د هغوی له مشروع حقونو ملاتړ او په دې برخه کې د هر راز اسانتیاوو رامنځته کول خپل لومړیتوب وباله. حقاني ویلي، چې په متحده عربي اماراتو کې د افغان سوداگرو د شته ستونزو د حل لپاره به هر اړخیزې هڅې تر سره کوي.
د طالبانو د سفارت په اعلامیه کې دا نه ده، روښانه شوې چې په اماراتو کې د افغان سوداګرو ستونزې کومې دي او د حل لپاره به یې د کوربه کومو چاروکو سره مطرح کړي.
د یادونې وړ ده، متحده عربي امارات د هغو هېوادونو په ډله کې دی، چې طالبانو ته یې به دغه هېواد کې د افغانستان سیاسي استازولۍ په واک کې ورکړي دي.
