د رحمانالله لکڼوال د محکمې دویمه ناسته پرون د واشنګټن ډيسي په فدرالي محکمه کې ترسره شوه. نوموړی د لومړۍ درجې وژنې، د وژنې په نيت بريد او له وسلو سره تړلو نورو جرمونو په تور تورن دی. تر اوسه د قاضي د پرېکړې په اړه کوم رسمي راپور نهدی خپور شوی.
رحمانالله لکڼوال د محکمې په لومړۍ ناسته کې ټول تورونه رد کړي وو؛ خو د محکمې په دویمې ناسته کې پر هغه نور اضافي تورونه هم لګېدلي. تر ټولو لوی تور چې په نوموړي لګېدلی د قصدي وژنې تور دی.
رحمانالله لکڼوال د روان کال (د لېندي په ۶مه نېټه) د واشنګټن ډيسي په څنډه کې سپینې ماڼۍ ته نږدې د امریکا د ملي ګارد پر دوو سرتېرو د ډزو په تور نیول شوی دی. د راپورونو له مخې؛ په دې پېښه کې دواړه سرتېري ټپیان شوي وو او لکڼوال هم ټپي شوی و، چې وروسته یوې سرتېرې د ژورو ټپونو له امله په روغتون کې ساه ورکړه.
له یادې پېښې وروسته د امریکا ولسمشر ډونالد ټرمپ دغه برید «ترهګریز عمل» وباله او په کلکه یې وغانده. نوموړي له دې پېښې وروسته د افغانانو لپاره د امریکا د پناهغوښتنې ټول پروګرامونه ودرول او د نړۍ په بېلابېلو هېوادونو کې یې د امریکا سفارتونو ته سپارښتنه وکړه، چې افغانانو ته دې د ویزو د ورکړې لړۍ وځنډوي.
