د امنيتي ګواښونو له امله؛ په واڼه کې «رستم بازار» د لنډ مهال لپاره تړل شوی

د خيبرپښتونخوا د سوېلي وزيرستان په واڼه ښار کې رستم بازار د امنيتي ګواښونو له امله په لنډمهالي ډول تړل شوی. پوليس وايي، دغه اقدام د باور وړ استخباراتي معلوماتو تر ترلاسه کېدو وروسته د احتياطي تدابيرو په توګه شوی دی.
د پوليسو په وينا؛ له امنيتي خبرتيا سره سم ټول هټۍوال او ملکي وګړي له بازاره و اېستل شول، سوداګريز فعاليتونه ودرول شول او د بازار دننه تګ راتګ محدود کړای شو. د یادې سيمې د پوليسو قوماندان محمد طاهر شاه وایي، اضافي امنيتي ځواکونه ځای پر ځای شوي او د بازار د تګ راتګ لارو پر سر امنیتي پوستې هم جوړې شوې دي.
د دغه بازار تر تړل کېدو وروسته پوليسو د پلټنې عمليات پيل کړي دي. چارواکي ټينګار کوي، چې بازار به يوازې هغه مهال بېرته پرانيستل شي؛ کله چې ټول احتمالي ګواښونه لهمنځه يووړل شي.
دا په داسې حال کې ده، چې په شمالي او سوېلي وزيرستان کې د امنيتي پېښو زياتېدو د خلکو ورځنی ژوند او اقتصاد سخت اغېزمن کړی دی. د امنيتي ادارو په وينا؛ د امنیت د ټینګښت په برخه کې د خلکو همکاري اړينه ده او له اوسېدونکو غوښتل شوي، چې له ګونګوسو ډډه وکړي او مشکوک فعاليتونه له پوليسو سره شريک کړي.
