د هلمند د شپږو ولسوالیو تر منځ د غېږ نیونې سیالۍ وشوې

په هلمند کې د درېیو شمالي او درېیو سویلي ولسوالیو تر منځ د غېږ نیونې سیالۍ ترسره شوې. د هلمند ولایت لپاره د طالبانو د بدني روزنې او سپورټ مسوولین وايي، دغه سیالۍ په کجکي ولسوالۍ کې د ۱۰۰ لوبغاړو تر منځ وشوې او د سویلي ولسوالیو لوبغاړي د دغو سیالیو ګټونکي شول.
د هلمند لپاره د طالبانو د رسنیو دفتر د شنبې په ورځ (د مرغومي ۲۷مه) د یوې خبرپاڼې په خپرولو سره ویلي، دغه سیالۍ د درېیو شمالي سنګین، کجکي او موسی کلا او سویلي ګرشک، باباجي او ګرمسېر ولسوالیو د لوبغاړو تر منځ ترسره شوې.
د خبرپاڼې لهمخې، د سویلي ولسوالیو لوبغاړي د دغو سیالیو ګټونکي شول.
