د طالبانو د هرات والي رسنیز دفتر وايي، چې په دغه ولایت کې د افغانستان او ایران ترمنځ د تلونکو بسونو، ټکسی او بار وړونکو موټرو ته د بینالمللي پلېټونو د وېش لړۍ پیل شوه. دا لړۍ په لومړي ځل هرات کې پیل شوې او ټاکل شوې چې په وروستیو پړاوونو کې به نورو ولایتونو ته هم وغځول شي.
د طالبانو د هرات ولایت مقام نن شنبه، د مرغومي ۲۷ پر ایکس خواله رسنۍ لیکلي، چې دا لړۍ د طالبانو د کورنیو چارو وزارت د ټرافیکو عمومي رییس په حضور کې پیل شوه.
دوی په اعلامیه کې لیکلي، چې د هرات په ولایت کې به ۶۰۰عرادې ټکسي او بسونه او نږدې ۷زره باروړونکو موټرو ته نړیوال پلېټونه ووېشل شي.
د دې اقدام موخه ټرافیکو کې د غوره نظم رامنځته کول، د نقلیه وسایطو تګ راتګ کې اسانتیاوې برابرول او د افغانستان او ګاونډیو هېوادونو په ځانګړي ډول ایران ترمنځ د ټرانزیټي همکاریو پیاوړتیا ده.
طالبان ددې پېلټونو په بدل کې څومره مالیه او فیس اخلي په دې اړه یې معلومات نه دي ورکړي.
