هندي رسنۍ «انډیا ټوډې» په خپل یوه خپور کړي راپور کې ویلي چې د افغانستان په روغتیايي سکټور کې د پاکستاني درملو ونډه راکمه شوې او هندي درمل اوس په دغه هېواد کې تر بل هر وخت زیات د لاسرسي وړ او د افغان بازارونو مهمه برخه یې نیولې ده.
د دغې ورځپاڼې د راټولو شوو معلوماتو له مخې، هغه افغان بازارونه چې پخوا تر ډېره د پاکستاني درملو څخه ډک وو، اوس د هندوستان درملو یې ځای نیولی دی.
راپور زیاتوي، د درملو له سوداګرو نیولې تر ډاکټرانو او عامو خلکو پورې، ډېری کسان هندي درمل د پاکستاني درملو په پرتله هم د قیمت له پلوه او هم د کیفیت له اړخه غوره بولي. د روغتیايي کارپوهانو په وینا، هندي درمل د نړیوالو معیارونو سره نږدې تولیدېږي او د ناروغانو لپاره یې اغېز هم د باور وړ بلل کېږي.
د انډیا ټوډی د راپور له مخې، وروسته له هغې چې د پاکستان او افغانستان ترمنځ سوداګریزې لارې وتړل شوې، د دواړو لوریو ترمنځ سوداګري نږدې صفر ته راتیټه شوې ده. دې پرېکړې نه یوازې د افغانستان پر بازار اغېز وکړ، بلکې په خپله پاکستان کې یې هم د درملو پر صنعت ناوړه پایلې لرلي.
راپور وايي، د پاکستان په لاهور او کراچۍ ښارونو سربېره، د خیبر پښتونخوا په پېښور کې هم د درملو ګڼې فابریکې په ټپه ودرېدې؛ هغه فابریکې چې زیاتره تولیدات یې د افغانستان بازار ته ځانګړي شوي وو.
په همدې حال کې، د طالبانو د ریاستالوزرا اقتصادي مرستیال څه موده وړاندې افغان سوداګرو ته، په ځانګړي ډول د درملو کاروباریانو ته، سپارښتنه کړې وه چې د پاکستان پر ځای دې د سوداګرۍ لپاره پر بدیلو لارو او نورو هېوادونو غور وکړي.
د راپور له مخې، د افغانستان بازار ته د هندي درملو پراخ لاسرسی د سوداګرۍ د لارو د بدلون، د کیفیت د باور او د قیمت د مناسبوالي پایله ده، او تمه ده چې دا بهیر په راتلونکي کې لا پسې پیاوړی شي.
