د طالبانو د کورنیو چارو وزارت وايي، چې ددې ډلې د نیمروز امنیې قومندانۍ نن شنبه دوه تنه له ۲۸۶ دوربینونو سره نیولي دي. یادو کسانو دغه دوربینونه په یو مسافروړونکي موټر کې ځای پرځای کړي و او غوښتل یې چې له کندهار څخه یې لومړی نیمروز او بیا له هغه ځایه ایران ته قاچاق کړي.
د طالبانو د کورنیو چارو وزارت وایي نن شنبه، د مرغومي پر ۲۷مه نیول شوي کسان نیمروز کې د پولیسو له څېړنو وروسته په یاد ولایت کې ترهګرۍ سره د مبارزې مدیریت ته سپارل شوي دي.
که څه هم طالبان ادعا کوي چې د پخواني حکومت څخه ورته پاتې وسلې او نظامي وسایل یې خوندي دي خو دوی په بېلابېلو ولایتونو کې د سپکو او درندو وسلو د قاچاق د مخنیوي رپوټونه ور کوي.
د افغانستان د مخکیني جمهوري نظام تر پرځېدو او د امریکا په ګډون د ناټو ځواکونو له وتلو وروسته طالبانو ته د پرمختللو وسلو پاتې کېدو د سیمه ییز امنیت او ټیکاو په تړاو اندېښنې راپورته کړې دي.
خو د طالبانو خبره دا ده، چې په پاکستان کې د وسله والو ډلو له لوري د ناټو او امریکایي ځواکونو کارېدونکې وسلې په تېرو شلو کلونو کې افغانستان ته د لېږدولو پر مهال برمته او غلا شوې وې او په تور بازار کې په اسانه موندل کېدې.
