د ملګرو ملتونو پراختیايي پروګرام (UNDP) ویلي چې د دغه بنسټ په مشرۍ او د ملګرو ملتونو د نهو نورو ادارو په همکارۍ، د «دوامدارو حللارو ګډه پروژه» د افغانستان په ختیځو ولایتونو کې راستنېدونکو او کوربه ټولنو د ملاتړ په موخه پلې شوې ده.
د راپور له مخې، د ملګرو ملتونو د کډوالو د عالي کمېشنرۍ (UNHCR) د معلوماتو پر بنسټ، یوازې په ۲۰۲۵ کال کې له ایران او پاکستان څخه تر ۲.۸ میلیونو زیات افغانان هېواد ته جبري ستانه شوي دي.
راپور زیاتوي، دا پروژه چې د افغانستان د اماني صندوق (STFA) له لوري تمویلېږي، د بنسټیزو خدمتونو پیاوړتیا، د استوګنې او بیا مېشتېدو فرصتونو رامنځته کول او د ښځو پیاوړتیا خپل اساسي موخې بولي.
په دې ګډه پروژه کې دیو این ډي پيتر څنګ، د کار نړیوال سازمان (ILO)، د کډوالۍ نړیوال سازمان (IOM)، د خوړو او کرنې سازمان (FAO)، د وګړو صندوق (UNFPA)، د کډوالو عالي کمېشنري (UNHCR)، د ماین پاکۍ اداره (UNMAS)، د ښځو اداره (UN Women) او د استوګنې پروګرام (UN-Habitat) برخه لري.
د راپور له مخې، د پروژې په ترڅ کې سلګونه کورونه په لمریزې برېښنا سمبال شوي او په ننگرهار او لغمان ولایتونو کې د ځوانانو او ښځو لپاره د فني او حرفوي زدهکړو پروګرامونه پيل شوي دي. د دې پروژې موخه د راستنېدونکو لپاره د اوږدمهاله او دوامدارو حللارو برابرول او د اقتصادي او ټولنیزو ستونزو کمول دي.
