د طالبانو د لوړو زده کړو وزیر ندا محمد ندیم، مشرانو او تجربه لرونکو ډاکټرانو ته سپارښتنه کړې چې د ځوانو ډاکټرانو ملاتړ وکړي او هغوی د راتلونکې مسولین وبولي، خو د نجونو د طبي زده کړو د محدودیتونو او د ښځینه روغتیاپالانو کمښت ته یې اشاره نده کړې.
ندیم د کابل طبي علومو پوهنتون د لاسته راوړنو په غونډه کې استادانو ته وویل: «د ټکنالوژۍ له ګټې کار واخلئ، نوې علمي لاسته راوړنې رامنځته کړئ، علمي اثار ولیکئ او څېړنیز مرکزونه جوړ کړئ. د ټولو ملاتړ زموږ مسولیت دی.»
نوموړي همداراز ادعا وکړه چې په هېواد کې قومي او ژبني تعصب نشته او د ټولو ملاتړ د ښوونې او روزنې یوه مهمه برخه ده.
دا څرګندونې په داسې حال کې شوي چې تېرو درېیو کلونو کې د نجونو پر مخ د طبي زده کړو ټولې دروازې تړل شوي، او ګڼ روغتیايي مرکزونه د ښځینه روغتیاپالانو د کمښت له ستونزې سره مخ دي.
د طالبانو د لوړو زده کړو وزیر په وار وار پوهنتونونو او اکاډمیکو مرکزونو کې سخت محدودیتونه وضع کړي، او لسګونه تجربه لرونکي استادان له دندو ګوښه شوي او پر ځای یې د طالبانو له لوري ټاکل شوي کسان ګومارل شوي دي.
چارواکي او استادان اندېښمن دي چې د استادانو د کمښت او د نجونو د زده کړو محدودیتونه به د روغتیا سکتور په راتلونکې کې جدي اغېزې ولري.
