کییر سټارمر: ګرینلینډ د ډنمارک برخه ده، پر ناټو متحدینو تعرفې لګول «ناسم کار» دی

د برېتانیا لومړي وزیر کییر سټارمر ویلي، چې د ګرینلینډ سیاسي وضعیت روښانه دی او دا سیمه د ډنمارک د پاچاهۍ برخه ده، په داسې حال کې چې هغه د ناټو پر متحدینو د تعرفو لګول د ګډ امنیت پر ضد اقدام بللی او ټینګار یې کړی، چې لندن به دا موضوع له واشنګټن سره په مستقیم ډول وڅېړي.
کییر سټارمر د یک شنبې په ورځ په ایکس لیکلي، چې د ګرینلینډ راتلونکی باید د همدې ټاپو د خلکو او د ډنمارک د دولت لهخوا وټاکل شي. نوموړي ټینګار وکړ چې د دې سیمې په اړه د برېتانیا دریځ «ډېر روښانه» دی او هېڅ بهرنی لوری حق نه لري د هغې پر برخلیک فشار راولي.
د برېتانیا لومړي وزیر همدارنګه د شمالي قطب د امنیت موضوع د ناټو لپاره حیاتي بللې او لیکلي یې دي، چې د ارکتیک امنیت یوازې د یوې یا دوو هېوادونو مسله نه ده، بلکې د ناټو د ټولو غړو ګډه اندېښنه ده. د هغه په وینا، متحدین باید په ګډه او لا پیاوړې همغږۍ سره د روسیې لهخوا د ارکتیک په بېلابېلو برخو کې راولاړېدونکو ګواښونو پر وړاندې اقدام وکړي.
سټارمر په خپل بیان کې د ناټو پر متحدینو د تعرفو لګولو په اړه هم سخت دریځ خپل کړی او دا اقدام یې «په بشپړه توګه ناسم» بللی. هغه لیکلي، چې پر هغو هېوادونو اقتصادي فشار راوستل، چې د ناټو د ګډ امنیت لپاره هڅې کوي، د ایتلاف له اصولو سره په ټکر کې دي.
د برېتانیا لومړي وزیر زیاته کړې، چې لندن به دا موضوع له امریکايي ادارې سره په مستقیمو خبرو کې تعقیب کړي، څو د ناټو د متحدینو ترمنځ سیاسي او امنیتي همغږي زیانمنه نه شي.
