د طالبانو د سرحدونو، قومونو او قبایلو چارو وزارت لهخوا «د اسلامي نظام بقا او د ولس هوساینې» تر عنوان په جوړه شوې غونډه کې، د شیعه ګانو استازي سید حسن فاضلزاده ویلي چې طالبانو د تعصب ریښې له منځه وړي او دا مهال د قومونو ترمنځ د جلاوالي او تعصب ستونزه نه شته.
نوموړي د تیر جمهوریت د دورې په اړه ویلي چې په تېرو شلو کلونو کې پر خلکو قومي ټیکهدارانو واک چلولی و.
دا څرګندونې په داسې حال کې کېږي چې طالبانو تر اوسه د قومي او مذهبي لږکیو حقونو او سیاسي ګډون ته لازم پام نه دی کړی. منتقدین ټینګار کوي چې طالبان باید یو ټولګډونه حکومت جوړ کړي، تر څو د هېواد د ټولو قومونو او مذهبي ډلو استازولي په کې تضمین شي.
ملګرو ملتونو هم د ټول شموله حکومت جوړول د طالبانو د نړیوال رسمیت پېژندنې له مهمو شرطونو څخه بللي دي.
