د طالبانو تر واک لاندې دولتي شرکتونو لوی ریاست وايي، چې د ۱۴۰۴ لمریز کال په بهیر کې د ۱۵۱۰ تنو بهرنیو وګړو او سیلانیانو لپاره د ویزو د تمدید او خروج ټول قانوني پړاوونه ترسره شوي دي. د یاد ریاست په وینا، ۱۰۱۳ تنو بهرنیو سیلانیانو ته رسمي مکتوبونه ورکړل شوي دي.
د د طالبانو د دولتي شرکتونو لوی ریاست نن یکشنبه، د مرغومي پر ۲۸مه نېټه په اېکس کې لیکلي، چې د یاد ریاست تر چتر لاندې د افغان ټور شرکت ۱۰۱۳ تنو بهرنیو سیلانیانو لپاره، د رسمي مکتوبونو له لارې د هېواد بېلابېلو تاریخي، سیاحتي او توریستي ولایتونو ته قانوني، منظم او په رسمي توګه سفرونه تنظیم کړي او د خپلو ځانګړو لېږد وسایطو (موټرو ) له لارې یې لېږدولي دي.
دغه ریاست په خپله اعلامیه کې ددې کال کې د خپلو عوایدو په اړه معلومات نه دي ورکړي.
د کارپوهانو په وینا، طالبان پر خواله رسنیو مشهور سېلانیان تر خپل واک لاندې سیمو کې د امنیت په تړاو د تبلیغاتو لپاره کاروي.
نږدې دوه کاله وړاندې په بامیان کې هسپانوي سېلانیان د ناڅرګندو وسلهوالو له لوري ووژل شول او له هغې راورسته د بهرنیو سېلانیانو په شمېر کې کموالی هم راغلی دی.
د امریکا په ګډون یو شمېر هېوادونو له خپلو وګړو غوښتي چې افغانستان اوس مهال باثباته او د ښه امنیت لرونکی هېواد نهدی او وګړي یې باید له ورتګ څخه ډډه وکړي.
د جلال اباد ښار په یوه دولتي ښوونځي کې د ازموینو د صحنې یوه ويډیو چې افغانستان انټرنشنل ترلاسه کړې، ښيي، چې د ښوونکو ترڅنګ د ټولو زده کوونکو پر سر پګړۍ دي.
ځینو زده کوونکو او ښوونکو نن یکشنبه، د مرغومي پر ۲۸مه وویل، چې که کوم ښوونکی او زده کوونکی پګړۍ پر سر نه کړي، نو ښوونځي ته نه پرېښودل کېږي.
همدراز ځینې ښوونکي نیوکه کوي، چې طالبان د ږیرې پرېښودو په تړاو له دوی جبري ضمانت خط اخلي او که څوک یې له شرایطو او غوښتنو سرغړونه کوي، له دندو لرې کیږي.
د روان کال د وري په میاشت کې افغانستان انټرنشنل راپور ورکړ، چې د افغانستان په بېلابېلو ولایتونو او له هغې ډلې په هرات، کابل، فراه، غزني، خوست او ننګرهار ولایتونو کې په ښوونځیو کې د طالبانو لهخوا د جبري یونیفورم د پلي کېدو لړۍ روانه ده.
هغه وخت د طالبانو د پوهنې وزارت پر اېکس پاڼه خبر ورکړی و، چې په ټولو ولایتونو کې ښوونځي ته د رنګارنګه جامو له اغوستلو د مخنیوي چاره په چټکۍ سره روانه ده.
د طالبانو د پوهنې وزارت د دغې ډلې د مشر ملاهبت الله په امر په دولتي او خصوصي ښوونځیو کې د ټولو زدهکوونکو او ښوونکو لپاره جبري یونیفورم ټاکلی.
تر دې وروسته ښوونکي او زدهکوونکي اړ دي، چې د سپین رنګه کالیو ترڅنګ پګړۍ هم وتړي.
د طالبانو د پوهنې وزیر حبیب الله اغا په لاس لاسلیک شوي لارښود کې راغلي ول، «هغه زدهکوونکي چې له کوم معقول لامل پرته دغه مقررات نه څاري؛ لومړی به ورته توصیه وشي او که دوی سرغړونه تکرار کړي، نو دوی به اړ شي چې د خپلو کورنیو په حضور کې ژمنه وکړي».
په ښوونځيو کې د یونیفورم په اړه د ملا هبت الله حکم ډېری زدهکوونکي له رواني فشار او له دغه امر څخه د سرغړونې په صورت کې د نیولو ګواښونو سره مخ کړي دي.
د طالبانو سرچینو نن یکشنبه، د مرغومي پر ۲۸مه وویل، چې د طالبانو د کابل د استخباراتو رییس ملا عبدالجبار چې په ابو خالد مشهور دی، له دې وړاندې دوه ودونه درلودل.
د رارسېدلو معلوماتو له مخې، د طالبانو د کابل د استخباراتو رییس او د هغه د نوې کوژدنې عمرونه هم ډېر سره توپیر لري او دغه واده ته د نجلۍ کورنۍ د اقتصادي ستونزو له مخې غاړه اېښې ده.
د سرچینو په وینا، ابو خالد له خپل نوي خسر سره ژمنه کړې ده، چې د هغه لور ته به په کابل کې کور اخلي او ځان ته ژوند به ورسره کوي او همدراز ځینې دي کورنۍ غړي به یې هم په ادارو کې وګوماري.
ابو خالد څو ورځې وړاندې د طالبانو د کورنیو چارو وزیر سراج الدین حقاني له خوا د ښو کړنو له امله ستاینلیک هم ترلاسه کړ.
د سرچینو په وینا، د طالبانو د کابل د استخباراتو رییس له دې وړاندې هم په څو ولایتونو کې د طالبانو د مشر ملاهبت الله له خوا په دندو ګومارل شوی و.
له دې وړاندې هم د طالبانو ځیني دیني عالمانو پر خپلو همکارانو نیوکې کړې وې، چې د ملاهبت الله د فرمان نافرماني کوي او د امارت په پیسو نوي ودونه کوي.
عام خلک نیوکه کوي، چې طالبان د خپلې ډلې د مشر ملاهبت الله فرمانونونه پر ځانونو نه عملي کوي، خو پر عامو خلکو فشار راوړی چې د ملاهبت الله فرمانونو ته غاړه کښیږدي.
له دې وړاندې د طالبانو د بدري عملیاتي قطعې قوماندان حمید خراساني افغانستان انټرنشنل ته تایید کړې وه، چې د څلورم واده مراسم یې په کابل ښار کې ترسره کړل.
د طالبانو ځینې مشران او قوماندانان په دې تورن شول، چې نکاح شوې ښځې یې بیا ځانونو ته نکاح کړې دي او ځینو یې په زور او د نجلۍ له خوښې پرته ودونه کړي دي.
د طالبانو په ډله کې څو ودونه اوس عامه خبره ده.
واک ته د طالبانو له بیارسېدو وروسته، ددې ډلې ګڼو مشرانو او غړو دویم، درېیم او څلورم ودونه کړي دي.
دا په داسې حال کې ده، چې تر دې مخکې د طالبانو مشر هبت الله اخوندزاده په یوه فرمان کې د دغې ډلې غړي له څو ودونو کولو منع کړي وو.
په هغه وخت کې ویل شوي وو، چې د طالبانو د مشرانو څو ودونه «د دښمنانو د نیوکو لامل کیږي.»