د هلمند د سوداګرۍ او پانګونې خونې مسوولین وایي، د افغانستان د پنبې صادراتو نړیوالو بازارونو ته لار موندلې او دا محصول اوس د پاکستان پر ځای ترکیې، بنګلهدېش او ایران ته صادرېږي، چې افغان سوداګرو ته یې نوې اقتصادي هیلې پیدا کړې دي.
د هلمند د سوداګرۍ او پانګونې خونې رییس غلام یحیی ویلي، له پاکستان سره د سوداګریزو لارو تړل کېدو که څه هم ستونزې رامنځته کړې، خو په عین حال کې یې افغان سوداګر دې ته اړ کړل چې بدیل بازارونه ولټوي.
د نوموړي په وینا، د افغانستان پنبه دا مهال د بنګلهدېش، ترکیې او ایران په بازارونو کې د پاکستان په پرتله په لوړه بیه پلورل کېږي، چې دا چاره د پنبې د تولید او صادراتو لپاره مهم اقتصادي فرصت بلل کېږي.
د سوداګرۍ خونې مسوولین زیاتوي، له پاکستان سره د نږدې څلور میاشتو لپاره د سوداګریزو لارو تر تړل کېدو وروسته، افغان سوداګرو په تدریجي ډول د صادراتو نوې لارې فعالې کړې او وتوانېدل چې د خپلو سوداګریزو فعالیتونو یوه لویه برخه بېرته منظم کړي.
