د طالبانو د میدان وردګ ولایت امنیه قومانداني وایي چې د دغه ولایت د مرکز میدان ښار اړوند پولاد خانې سیمه کې د یوې ناچاودې مرمۍ د چاودنې له امله یوه نجلۍ مړه شوې او درې نورې نجونې ټپي شوې دي.
د طالبانو د امنیه قوماندانۍ په خبرپاڼه کې راغلي، چې یاده پېښه نن د یکشنبې په ورځ په غره کې د بوټو راټولولو پرمهال وې. په خبرپاڼه کې د پېښې لامل د ناچاوده توکو په اړه د ماشومانو بېپامي او ناپوهي ښودل شوې ده.
د طالبانو د امنیتي مسوولینو په وینا، ټپي شوې ماشومانې د لا ښې درملنې لپاره پلازمېنې کابل ته لېږدول شوې دي.
دا په داسې حال کې ده، چې تېره ورځ په فاریاب ولایت کې د راکټ د یوې ناچاودې مرمۍ د چاودنې له امله دوو ماشومانو خپل ژوند له لاسه ورکړی و، او یوه ښځه او بل ماشوم سخت ټپیان شوي وو.
له دې وړاندې په کونړ کې هم ورته دوه پېښې شوې دي.
افغانستان د څو لسیزو جنګ جګړو له امله لا هم د ناچاوده توکو له جدي ګواښ سره مخ دی.
د بېلابېلو نړیوالو بنسټونو د راپورونو له مخې، په هېواد کې زرګونه ناچاوده ماینونه او جګړهییز مهمات پراته دي چې هر کال یې لسګونه ماشومان او ملکي وګړي قرباني کېږي.
ځینو افغان سوداګرو نن یکشنبه، د مرغومي پر ۲۸مه وویل، چې که څه هم پاکستاني چارواکي د افغان سوداګرو د کانټینرو سوځېدل د اورلګېدو پيښه بولي خو دوی له دې اړخه ډاډمن نه دي او شونې ده، چې په قصدي ډول سوځول شوي وي.
یو افغان سوداګر وویل، چې د پاکستان د ګمرک چارواکو د افغان سوداګرو کانټینر د نامعلومو دلایلو له امله درولي وو او د وتلو اجازه یې نه ورکوله، خو افغان سوداګرو د پاکستان د ګمرک له ادارې غوښتي و، چې که اجازه نه ورکوي نو د ګمرک تعزیري مالیات دې ورته معاف شي او دوی چمتو دي خپل توکي بېرته اړوندو هېوادونو ته ولیږدوي.
افغان سوداګر وايي، چې پاکستاني چارواکو دا ورسره منلې وه خو اوس د کانټینرونو له سوځیدلو وروسته اړ دي، چې د پاکستان ګمرک ادارې ته ددغو کانټینرونو پر سر راغلي ګمرکي تعزیري مالیه هم ور کړي.
د پاکستان حکومت او د ګمرک ادارې تر اوسه په دې اړه په رسمي ډول څه نه دي ویلي.
افغان سوداګرو له افغانستان انټرنشنل سره هغه ویډیوګانې او سندونه هم شریک کړل، چې د کراچۍ سوداګریز بندر په « پي اي سي ډي» پورټ کې د افغان سوداګرو د اړوندو کانټینرو د سوځېدو صحنې پکې ښکاري.
له شاوخوا سل ورځو راهیسې د افغانستان او پاکستان ترمنځ سوداګریزې لارې تړلې دي او تر دې دمه د لارې پرانېستلو په اړه کوم خبر نشته.
طالبان د سوداګریزو لارو د بېرته پرانیستلو لپاره له پاکستان څخه د درېیمګړي هېواد ضمانت غواړي او اسلام اباد ټینګار کوي، چې کابل دې د پاکستاني طالبانو د فعالیتونو مخه ونیسي.
