د پاکستان په کراچۍ کې د مرګونې اورلګېدنې په دوام، اور وژونکو لا هم د یکشنبې په ورځ د لسګونو کسانو د لټون عملیاتو ته دوام ورکړی. په دغه اورلګېدنه کې چې د شپږو کسانو مړینه تایید شوې، تر ۶۵ ډېر کسان لا هم لادرکه دي.
دا اورلګېدنه د شنبې په ورځ په کراچۍ کې په یوې ګڼېګوڼې سوداګریز مرکز کې رامنځته شوې او د ودانۍ ځینې برخې یې په کنډوالو بدلې کړې دي.
جیو نیوز شبکې راپور ورکړی، چې په دغه سوداګریز مرکز کې د مناسب هواکش نشتوالی د دې لامل شوی، چې ودانۍ له لوګیو ډکه شي او د ژغورنې عملیات پڅ کړي. د کراچۍ ښاروال مرتضی وهاب تایید کړه، چې ۶۵ کسان لا هم لادرکه دي.د سند ایالت د پولیسو مشر جاوېد عالم اودو وویل، چې د سوداګریز مرکز دننه د غالیو، فرشونو او څادرونو په څېر د اجناسو د شتون له امله اور لا هم بل دی. د پاکستاني چارواکو په وینا، په دې اورلګېدنه کې ۲۰ نور کسان ټپیان شوي هم دي.راپور ورکړل شوی، چې د دې اورلګېدنې په تعقیب سلګونه کسان د پېښې په ځای کې راټول شوي او پر ښاروال یې نیوکې کړې دي. یوې هټۍوالې یاسمین بانو وویل: «موږ په بشپړه توګه تباه شوو. د ۲۰ کلونو زیار او هڅې مو ټول لهمنځه ولاړل.»ژغورونکو وویل، که څه هم اوسمهال د ودانۍ ځینې برخې نړېدلي دي، خو د بشپړ نړېدو احتمال یې هم شته. د چارواکو د څرګندونو پر بنسټ، د دې اورلګېدنې لامل په برېښنايي سیسټم کې تخنیکي نیمګړتیا وه.دغه اورلګېدنه په داسې حال کې شوې ده، چې د تېرې جمعې په ورځ د کراچۍ په سوداګریز بندر کې هم یوه پراخه اورلګېدنه وشوه، چې په ترڅ کې یې په سوداګریزو توکو بار د افغان سوداګرو ۹۸ کانټینره سوځېدلي دي. افغان سوداګرو د دې اورلګېدنې زیان پنځه میلیونه ډالره اټکل کړی دی.
