د افغانستان د کرېکټ ملي لوبډله د ۲۰ اوریزو نړۍوالو سیالیو په ترڅ کې د ویسټانډیز لوبډلې پر وړاندې میدان ته ځي. د دغه سریز لومړۍ لوبه سبا د دوبۍ په نړۍوال کرېکټ لوبغالي کې ترسره کېږي. د افغانستان کرېکټ بورډ اعلان کړی، چې دا لوبه به د کابل پر وخت ماښام اووه بجې پیل شي.
نن د افغانستان د کرېکټ ملي لوبډلې روزونکي جاناتان تروټ او د ویسټانډیز لوبډلې لوبډلمشر برنډن کینګ له لوبې وړاندې خبري کنفرانس ته حاضر شول او د خبریالانو پوښتنو ته یې ځوابونه ورکړل.دا په داسې حال کې ده، چې د دوبۍ په کرېکټ لوبغالي کې په جلا مراسمو کې د دواړو لوبډلو د لوبډلمشرانو په شتون کې د دې سیالیو د اتلولۍ له جام څخه هم مخکتنه وشوه.د افغانستان کرېکټ بورډ د مخکېني اعلان پر بنسټ، د دې سریز درې واړه لوبې به د ۱۴۰۴ لمریز کال د مرغومي په ۲۹مه، د سلواغې په لومړۍ او دویمه نېټه په متحده عربي اماراتو کې ترسره شي. د دواړو لوبډلو ترمنځ په وروستیو پنځو مخامخ لوبو کې افغانستان دوه بریاوې ترلاسه کړي او ویسټانډیز درې ځلې د افغانستان په ماتولو بریالی شوی دی.
