د طالبانو دفاع وزیر محمد یعقوب مجاهد وايي، پاکستان له دې ډلې څخه غوښتي چې ډیورنډ کرښه د افغانستان او پاکستان ترمنځ د رسمي پولې په توګه په رسمیت وپېژني. هغه له طلوع نیوز خصوصي شبکې سره په مرکه کې ویلي، د دوحې او استانبول په ناستو کې د ډیورنډ کرښې د پېژندلو مسله راپورته شوې ده.
د هغه په وینا، پاکستاني لوري وړاندیز کړی و چې د «ډیورنډ کرښې» پر ځای د «سرحد» کلمه وکاروي.
ملا یعقوب مجاهد زیاته کړه، چې هغه پاکستاني چارواکو ته ویلي وو چې نه د افغانستان پخوانیو حکومتونو دا کرښه په رسمیت پیژندلې او نه هم طالبان دا په رسمیت پېژني.
هغه ټینګار وکړ، چې دا مسله باید د دواړو هیوادونو ترمنځ تاوتریخوالی او شخړې زیاتې نه کړي.
هغه وایي چې دا خبره یې د ۲۰۲۵ کال په اکتوبر میاشت کې د پاکستان د دفاع وزیر خواجه اصف په مشرۍ په دوحه کې د پاکستاني پلاوي سره په یوه غونډه کې وکړه.
دواړه لوري په قطر کې په هغه غونډه کې لنډمهاله اوربند ته ورسیدل خو په ترکیه او سعودي عربستان کې د خبرو اترو وروسته پړاوونه د دواړو خواوو ترمنځ د هوکړې په رامنځته کولو کې پاتې راغلل.
د ډیورنډ کرښې مسله د افغانستان او پاکستان ترمنځ یوه تاریخي شخړه ده.
افغان حکومتونو له لسیزو راهیسې دا کرښه د دواړو هېوادونو ترمنځ د رسمي پولې په توګه نه ده پیژندلې، پداسې حال کې چې پاکستان دا د دواړو هېوادونو ترمنځ نړیواله پوله ګڼي.
د طالبانو د دفاع وزیر د خپلې وینا په یوه برخه کې پاکستان ته خبرداری ورکړ، چې که کابل ناامنه شي، اسلام اباد به هم ناامنه شي.
نوموړي وویل:«که کابل ناامنه شي، اسلام اباد به هم ناامنه شي. که په کابل برید وشي، اسلام اباد به هم په نښه شي.»
په همدې حال کې مجاهد وویل، چې طالبان ژمن دي چې د خبرو اترو او ډیپلوماسۍ له لارې اختلافات حل کړي خو د هغه په وینا، پاکستان داسې چلند نه لري.
د پاکستان حکومت له افغان طالبانو سره هر ډول خبرې اترې رد کړې دي.
د دواړو خواوو ترمنځ وروستیو نښتو ته په اشارې سره، د طالبانو د دفاع وزیر ادعا وکړه، چې د هر وژل شوي افغان په بدل کې څو پاکستاني سرتیري وژل شوي دي.
د یادونې وړ ده، په روانو جګړو کې طالبان او پاکستاني نظامیان یو بل ته د مرګ ژوبلې اړولو ادعاوې کوي خو د ملګرو ملتونو راپور ویلي، چې په دې جګړو کې یوازې ۵۶ عام افغانانو وژل شوي او ۱۲۹ نور ټپیان دي.
د طالبانو او پاکستان ترمنځ د جګړې د اوږدېدو سره همهاله په خوست، پکتیکا، پکتیا او ننګرهار ولایتونو کې ځینو قومي مشرانو او پرنفوسه شخصیتونو سره د طالبانو والیانو ځانګړي ناستې کړي دي.
ځيني قومی مشرانو افغانستان انټرنشنل - پښتو ته وویل، چې طالبانو د بیا ځلي واک ته رسېدو سره دې ډلې پخواني قومي مشران او پرنفوسه څېرې د طالبانو غونډو ته نه ور غوښتل او نه یې هم کومو ځانګړو غونډو ته بلنه ورکوله، خو له پاکستان سره د جګړې په جریان کې د طالبانو د قبایلو چارو ریاستونو اړیکې نیولي دي او خپلمنځي غونډې یې جوړې کړي دي ترڅو دوی د پاکستان ضد لاریونونو ته یې چمتو کړي.
په خوست کې یو قومي مخور وویل:«په تېرو څلورو کالونو کې زمونږ پوښتنه د طالبانو چارواکو ونه کړه، اوس چې ورباندې بده ورځ راغله ورڅخه غوښتل شوي چې د پاکستان پرضد یوه غونډه جوړه کړي.»
په خوست کې قومي مشرانو وویل، چې دا لومړی ځل دی چې د طالبانو د خوست ولایت مقام ته غوښتل شوي وو، د طالب چارواکو غوښتنه دا وه، چې د پاکستان پرضد او د طالبانو د ملاتړ لپاره غونډې او لاریونونه جوړ کړي او ولسي خلک یې د ګډون لپاره وهڅوي.
طالبانو له دې وړاندې د قومي مشرانو او پرنفوسه څېرو سره منظمې غونډې نه درلودې خو لومړی ځل د پاکستان او طالبانو ترمنځ د جګړو پر مهال تېره ورځ د طالبانو د ننګرهار والي محمد نعیم اخوند او د قومي مشرانو ترمنځ ناسته وشوه.
په دې ناسته کې د طالبانو د ننګرهار والي وویل:« که ولسونه د خپلو اولادونه ترڅنګ دریږي دا یې حق دی او مونږ یې ستاینه او هرکلی کوو.»
نه یوازې دا چې په ولایتونو بلکې طالبانو په کابل کې هم ځیني پخواني افغان چارواکي او د ولسي جرګې ځیني غړي اړ کړي و، چې په کابل کې خبري ناسته جوړه او د پاکستان پرضد جګړه کې د طالبانو ملاتړ اعلان کړي.
پکتیکا او خوست ولایتونو کې ځینو پخوانیو افغان نظامیانو وویل، چې طالبان په زوره ډیورنډ کرښې ته وړي ترڅو د پاکستان پرضد جګړه کې ورسره همکاري وکړي.
یو پخواني نظامي وویل:« د تېرو دریو ورځو راهسې پخواني نظامیان طالبان د جګړې لپاره له ځان سره وړي او تېره ورځ هم د پکتیکا په ارګون ولسوالۍ کې ګرځېدل ترڅو پخواني نظامیان پیدا کړي.»
د پرځېدلي جمهوریت ځینو نظامیانو وویل، چې طالبان د هغو کسانو په لټه کې دي ترڅو له دوی سره همکاري وکړي، چې درنو وسلو د کارولو وړتیا ولري.
د امنیتي ستونزو له امله د هغو پخوانيو افغان نظامیانو نومونه نشو په ډاګه کولی چې اوس مهال د طالبانو په لیکو کې د پاکستان پرضد جګړه کې برخه لري او په دې کې د هاوان او توپچي برخې زده کړي هم موجود دي.
د ترلاسه شو معلوماتو له مخې طالبانو نه یوازې د ډیورنډ کرښې په اوږدو کې پرتو ولایتونو قومي مشران او نظامیان هڅولي چې د پاکستان پرضد روانه جګړه کې لاریونونه وکړي او د دوی ملاتړ وکړي بلکې په نورو ولایتونو کې هم ورته راپورونه شته، چې طالبانو په امر لاریونونه جوړ شوي دي.
د یادونې وړ ده، نن یولسمه ورځ ده چې د طالبانو او پاکستان ترمنځ جګړه روانه ده، چې ملکیانو ته هم پکې مرګ ژوبله اوښتې ده او زرګونه کورنۍ د جګړې له امله له خپلو کورونو بې ځایه شوي دي.