د پاکستان د پوځ ویاند احمد شریف چودري ادعا کړې، چې تر موقت اوربند پورې یې په هوايي بریدونو او مخامخ جګړو کې د طالبانو او ټيټيپي ۷۰۷ غړي وژلي دي. هغه همدا راز ادعا کړې، چې پر ډیورنډ کرښه یې د طالبانو ۵۵ پوستې ویجاړې کړي او ۴۴ نورې یې ترې نیولې دي.
نوموړي له "جیو نیوز" ټلوېزیوني شبکې سره په ځانګړې مرکه کې زیاته کړه، چې پر ډیورنډ کرښه له طالبانو څخه دغه نیول شوې ۴۴ پوستې هغه ځایونه وو، چې وسلهوالو پرې تګراتګ کاوه. د پاکستان د پوځ ویاند همدا راز ادعا کړې، چې د "غصبالحق" په عملیاتو کې یې د طالبانو ۲۳۸ پوځي ټانکونه او وسایط له منځه وړي دي.
د ده په خبره، د پاکستان هوايي ځواکونو د افغانستان په خاوره کې د وسلهوالو ۸۱ مرکزونه او نښې تر بریدونو لاندې راوستې دي.
د پاکستان د پوځ ویاند همداراز ادعا کړې، چې د دغو بریدونو په پایله کې پاکستان ته د وسلهوالو د اوښتو او قاچاق مخه ډب شوې ده. احمد شریف چودري وایي، افغان طالبانو د دوی د بریدونو له وېرې پاکستاني طالبان (ټيټيپي) په بېلابېلو سیمو کې پټ کړي دي.
تر دې وړاندې هم د پاکستان حکومتي چارواکو په پراخه کچه د افغان طالبانو او ټيټيپي د وسلهوالو د وژل کېدو ادعاوې کړې وې، خو پر کابل واکمنو بیا تل دغه ادعاوې رد کړې دي.
د یادولو ده، چې د پاکستاني پوځ د دغو تازه څرګندونو په تړاو تر اوسه په کابل کې د طالبانو حکومت هېڅ ډول غبرګون نه دی ښودلی.
