پاکستان د وري پر پنځمه نېټه د تورخم دروازه پرانیزي

پاکستاني چارواکو ویلي، چې د طالبانو په غوښتنه د تورخم ترمینل د بیا پرانېستلو پرېکړه شوې ده.

په تورخم کې د پاکستان د کډوالو برخې د سرچینو په وینا، په ناقانونه توګه مېشتو بهرنیانو د بېرته ستنولو لپاره ټول انتظامات بشپړ شوي دي.

یاد چارواکي وایي چې «د لنډي کوتل انتظارځای کې د بېلابېلو فدرالي او ایالتي ادارو کارکوونکي ځای پر ځای شوي دي څو د اخراج او بېرته ستنولو بهیر په منظم او شفاف ډول ترسره شي».

یادې سرچینې وايي، چې په لومړي پړاو کې به له ټول پاکستان نه شړل شوي کسان د تورخم له لارې افغانستان ته ولېږدول شي او وروسته به دای ایف ارپالیسۍ له مخې په منظم او پړاویز ډول د اخراج لړۍ پیل شي.

د سرچینو په وینا اړوندې ادارې چمتو شوې او کارکوونکي یې په لنډي کوتل کې د اخراج پروسې د مدیریت لپاره ګومارل شوي دي.

د افغان کډوالو د بیرته راستنیدو پروسه پر کرښه د کړکیچونو له امله د تیر کال د کب له ۸مې راهیسې ځنډول شوې وه، په داسې حال کې چې دوه اړخیزه سوداګري د ۲۰۲۵ کال د مېران له ۲۰مې راهیسې تړلې پاتې ده.

طالبانو تراوسه په دې اړه څه نه دي ویلي.