د طالبانو د عامې روغتیا وزارت وايي، د شنبې په ورځ، د وري ۲۲مه، په هېواد کې د ماشومانو ګوزڼ یا پولیو پر ضد د واکسین درې ورځنۍ کمپاین پیل شو. د یاد کمپاین په ترڅ کې به شاوخوا ۱۲،۶ میلیونه هغه ماشومان چې عمرونه یې له پنځو کلونو کم دي، د پولیو پر ضد واکسین شي.
د طالبانو د عامې روغتیا وزارت په خبرپاڼه کې راغلي، چې دغه کمپاین د نړۍوالو ادارو په ملاتړ د هېوادو په ټولو حوزو کې پلی کېږي.
د مسولینو په وینا، دغه لړۍ یوازې په دایکندي او بامیان ولایتونو کې د سړي هوا له امله ځنډېدلې او په غور ولایت کې به هم په یوه اونۍ په ځنډ ترسره شي.
د طالبانو د عامې روغتیا وزیر نورر جلال جلال وویل:« موږ به خپلې ټولې هڅې وکړو او پولیو واکسین کمپاینونو او نورو اړینو روغتیايي خدماتو ته به تر هغې دوام ورکړو، څو دا ناروغي په بشپړه توګه له افغانستان نه ورکه کړو».
دا په داسې حال کې ده چې د روغتیا نړۍوال سازمان په خپل وروستي راپور کې افغانستان او پاکستان لا هم د پولیو ویروس له اړخه خوندي نه دي ګڼلي.
د دغه سازمان د اجراییوي بورډ په ۱۵۸مه غونډه کې وویل شول، چې د ۲۰۲۵ کال تر اکتوبر پورې په نړۍ کې د پولیو ټولې ۳۸ پېښې ثبت شوې وې، چې ټولې یې یوازې په افغانستان او پاکستان کې وې.
که څه هم دا شمېر د تېرو کلونو په پرتله کم شوی، خو د ویروس دوامدار شتون لا هم د بشپړ وررکاوي پر وړاندې لویه ننګونه ګڼل کېږي.
