د افغانستان کرېکټ بورډ وايي، د کرېکټ ملي لوبډلې نوی ټاکل شوی مشر روزونکی ریچارډ پایبس د ملي لوبډلې په تمریناتي کمپ کې د ګډون په موخه کابل ته رسېدلی دی. پایبس د غوراوي کمېټې، نړیوال کرېکټ، کورني کرېکټ او د ظرفیت لوړونې مرکز د مسوولینو ترڅنګ له دواړو لوبډلمشرانو سره هم کتلي دي.
د افغانستان کرېکټ بورډ د شنبې په ورځ (د وري ۲۲مه) د یوې خبرپاڼې په خپرولو سره ویلي، په دې کتنه کې د ملي لوبډلې د راتلونکو سیالیو، پلانونو او په ځانګړي ډول د تمریناتي کمپ د پیل او مدیریت په اړه هراړخیزې خبرې اترې شوې دي.
د افغانستان د کرېکټ بورډ د پلان لهمخې، د ظرفیت لوړونې مرکز تر مستقیمې څارنې لاندې او د نوي مشر روزونکي په حضور کې، د نږدې ۴۰ افغان لوبغاړو لپاره یو میاشتنی تمریناتي کمپ سبا (یکشنبه) پیل او د مې تر ۱۶مې به دوام وکړي.
د خبرپاڼې لهمخې، په دې موده کې به افغان اتلان د هند پر وړاندې راتلونکې ټېسټ لوبې او د یو ورځنیو سیالیو لوبلړۍ ته پوره او هراړخیز چمتووالی ونیسي.
د یادونې وړ ده، چې کابل ته دا د ریچارډ پایبس لومړنی سفر دی.
