د طالبانو ستره محکمه وايي، د نیمروز د خاشرود ولسوالۍ لپاره د دوی د ابتداییه محکمې د پرېکړې لهمخې، ۹۱۵۵ کیلوګرامه قاچاقي انساني او حیواني درمل له منځه وړل شوي دي. طالبانو په دې اړه چې ایا د دغو توکو د لیږد په تړاو څوک نیول شوي او که څنګه، څه نهدي ویلي.
د طالبانو سترې محکمې د شنبې په ورځ (د وري ۲۲مه) د یوې خپرپاڼې په خپرولو سره ویلي، دغه درمل د زرنج- دلارام د لویې لارې په اوږدو کې ترلاسه شوي وو.
د خبرپاڼې لهمخې، یاد درمل له قانوني څېړنو او د محکمې له پرېکړې وروسته وسوځول شول، خو په خبرپاڼه کې په دې اړه چې د دغو درملو د قاچاق په تړاو څوک نیول شوي او که څنګه، څه نهدي ویل شوي.
دا په داسې حال کې ده، چې د نیمروز د مرکز زرنج ښار د درېیمې امنیتي حوزې په شاوخوا سیمو کې هم ۲ کسان د انساني درملو او نورو قاچاقي توکو د قاچاق په تړاو نیول شوي دي.
د یادونې وړ ده، چې د افغانستان او پاکستان تر منځ له شخړې وروسته د دواړو لورو تر منځ هر ډول سوداګري په ټپه درول شوې او ځینې قاچاق کوونکي هڅې کوي، د اړتیا وړ توکي هېواد او یا هم نورو هېوادونو ته قاچاق کړي.
