په نیمروز کې د طالبانو امنیه قوماندانۍ ویلي، چې په «سر دښت» او «مارګو دښت» سیمو کې یې له ایران څخه د درملو او نورو قاچاقي توکو د قاچاق مخه نیولې ده. طالبانو ویلي، چې د درملو د قاچاق په تور یې دوه کسان هم نیولي دي.
په ورته مهال په هلمند کې د طالبانو رسنیز دفتر د یوې خبرپاڼې په خپرولو سره ویلي، چې د یاد ولایت په ګرمسیر ولسوالۍ کې یې نیول شوي څه باندې دوه ټنه درمل وسوځول.
له ګاونډیو هېوادونو څخه د درملو او نورو توکو قاچاق پر داسې مهال زیات شوی، چې د تېرې څو میاشتنۍ شخړې له امله د افغانستان او پاکستان ترمنځ ټولي سوداګریزې لارې تړل شوې دي او ګڼ کسان هڅه کوي له ایران او پاکستان څخه په غیرقانوني لارو درمل او نور توکي افغانستان ته وارد کړي.
