د طالبانو د پېښو پر وړاندې د مبارزې او چمتووالي ادارې ویاند مرستیال تاج محمد همت وایي، چې په افغانستان کې د وروستیو طبیعي پېښو له کبله تر ۸زره ډېرې کورنۍ زیانمنې شوې، نږدې ۶زره کرنیزه ځمکه ویجاړه شوې او څه باندې ۱۸زره څاروي تلف شوي دي.
د هغه په وینا؛ د یادو پېښو له امله ۱۷۹ کسان مړه، ۲۳۸ نور ټپیان او ۹ کسان لادرکه شوي دي. هغه وایي، د وري له ۶مې نېټې راهیسې په افغانستان کې د سختو ورښتونو او سېلابونو له امله ۱۲۷۷ کورونه په بشپړ ډول، ۵زره او ۷۷۰ کورونه په نسبي ډول او ۳۷۲ کیلو متره سړکونه ویجاړ شوي دي.
یادې ادارې تېره ورځ هم ویلي و، چې په تېرو ۴۸ ساعتونو کې ۱۷ ولایتونو کې د بارانونو، سېلابونو او د کورونو چتونو پرېوتو له امله ۲۲ کسان مړه او ۹ نور ټپیان شوي دي. د طالبانو د پېښو پر وړاندې د مبارزې ادارې ویاند محمدیوسف حماد ویلي و، چې دغه زیانونه په کابل، پروان، پنجشېر، پکتیا، پکتیکا، غزني، کندهار، فراه، بادغیس، بلخ، سرپل، فاریاب، بدخشان، ننګرهار، لغمان او کونړ ولایتونو کې خلکو ته اوښتي دي.
