د پاکستان په بلوچستان ایالت کې ځايي پولیسو خبر ورکړی، د دغه ایالت د کویټې ښار لوېدیځ بایپاس هزارګنجي سیمه کې ناپېژاندو وسلهوالو پر هزاره وګړو ډزې کړې چې له امله یې دوه کسه وژل شوي او ۳نور ټپیان دي.
د عیني شاهدانو په وینا؛ بریدګر په یوې رېکشا کې سپاره وو او هغه مهال یې پر خلکو ډزې وکړې، چې هغوی له سبزي منډۍ څخه د سبزیو پر پېرلو بوخت وو. تر پېښې وروسته د هزاره ټاون اوسېدونکو لاریون کړی او د لویدیځ بایپاس لاره یې تړلې ده.
هغوی له حکومته غوښتي، چې د برید عاملان دې ژر تر ژره ونیسي. لاتر اوسه پورې د دغه برید مسوولیت کومې ډلې پر غاړه نهدی اخیستی.
اوکراین او روسیې د شنبې په ورځ اعلان وکړ. چې په تازه تبادله کې دواړو خواوو هر یوه ۱۷۵ بندیان له یو بل سره تبادله کړي دي؛ دا ګام د عیسویانو د ایسټر یا اختر په مناسبت اخیستل شوی دی. دواړو لورو همدارنګه له ۳۲ ساعتونو لنډمهاله اوربند سره هم هوکړه کړې ده.
د اوکراین ولسمشر ولادیمیر زېلېنسکي د شنبې په ورځ (د وري ۲۲مه) وویل، چې ۱۷۵ سرتېري او ۷ ملکي اوکراینیان د روسیې له زندانونو خوشې شوي او بېرته خپل هېواد ته ستانه کړل شوي دي. د هغه په وینا، دغه سرتېري د جګړې په بېلابېلو جبهاتو کې وو او ډېری یې له ۲۰۲۲ کال راهیسې په اسارت کې وو.
بل لور ته، د روسیې دفاع وزارت هم ویلي، چې ۱۷۵ سرتېري او ۷ ملکي وګړي یې د اوکراین له اسارته ازاد کړي دي. په دې تبادله کې متحده عربي امارات د منځګړي رول لوبولی دی.
د روسیې او اوکراین جګړه اوس څلورم کال ته داخله شوې ده. د دې جګړې د پای ته رسولو لپاره د امریکا په مشرۍ د منځګړیتوب هڅو تر اوسه کومه څرګنده پایله نهده ورکړې او بنسټیز اختلافات، په ځانګړي ډول د ځمکنۍ بشپړتیا او امنیتي تضمینونو په اړه، لا هم پر خپل ځای دي.
تر دې دمه دې جګړې لسګونه زره کسان وژلي او میلیونونه نور یې بېځایه کړي دي.
د سعودي عربستان فضایې ادارې اعلان کړی، چې د دغه هېواد «شمس» سپوږمکۍ د «ارتمیس ۲» ماموریت په چوکاټ کې په بریالیتوب سره فضا ته توغول شوې او له هغې سره لومړنۍ اړیکه هم ټینګه شوې ده. له دې سره سعودي لومړی عربي هېواد شو چې د ناسا په مشرۍ په نړیوال فضایي پروګرام «ارتمیس» کې برخه اخلي
«ارتمیس ۲» ماموریت د دې پروګرام دویم پړاو دی، چې د ناسا او نورو همکارو هېوادونو په ګډه ترسره کېږي. د دې ماموریت هدف دا دی، چې له پنځوسو کلونو وروسته بیا انسانان د سپوږمۍ شاوخوا فضا ته ولېږدول شي او د راتلونکو سفرونو لپاره، په ځانګړي ډول مریخ ته د سفر زمینه برابره کړي.
په دې ماموریت کې څلور فضانوردان د «اوریون» په نوم فضايي بېړۍ کې چې د تر ټولو قوي راکټ په وسیله توغول شوې، د سپوږمۍ شاوخوا ګرځېدلي دي. همدارنګه سپوږمکۍ «شمس» هم د دې ماموریت د علمي تجهیزاتو برخه ده.
سپوږمکۍ «شمس» په بیضوي مدار کې د ځمکې له سطحې شاوخوا له ۵۰۰ تر ۷۰ زره کیلومتره لوړوالي کې فعالیت کوي. دا د لمر د فعالیتونو د څارنې او د فضا د هوا د څېړنو لپاره پراخ معلومات برابروي.
د سعودي چارواکي وایي، چې دا لاسته راوړنه د دولت د ملاتړ پایله ده او له ۲۰۳۰ ستراتیژۍ سره سم د یوه سیال اقتصاد د پراختیا لپاره مهم ګام ګڼل کېږي
په هالنډ کې مېشتو یو شمېر افغانانو پر افغانستان د پاکستان د بریدونو خلاف لاریون کړی او د جرمونو له نړیوالې محکمې یې غوښتنه کړې، چې د یاد هېواد د پوځ او حکومت مشران باید محاکمې ته راکش کړي. دغو افغانانو ویلي، پاکستان په دغو بریدونو سره «بشري جنایت» ترسره کړی دی.
د دغه لاریون یوې ګډونوالې سایرې نورزۍ وویل، چې پاکستاني عسکرو په وار وار پر ډیورند کرښه پر ملکي وګړو بریدونه کړي او تېرو میاشتو کې یې سلګونه افغانانو ته په هوایي بمباریو کې هم مرګ ژوبله اړولې ده. هغې وویل: «افغانان هېڅکله اجازه نهورکوي چې زموږ د ولس وینه تویه شي او موږ نړیوالو ته پېغام ورکوو، چې د دغه جنایت پر وړاندې اقدام وکړي».
د پلوشې همزاد په نوم یوې بلې افغانې هم په دغه لاریون کې پر افغانستان د پاکستان بریدونه وغندل او د ملکي وګړو په نښه کول یې د نړیوالو قوانینو او اصولو خلاف عمل وباله.
هغې زیاته کړه: «موږ نن ځکه راټول شوي یو چې نړیوالو ته خپل غږ ورسوو، څو مداخله وکړي او جنګ ختم کړي».
دغو لاریونوالو په خپل پرېکړه لیک کې د جرمونو له نړیوالې محکمې غوښتنه وکړه، چې د پاکستان د پوځ مشر عاصم منیر او د یاد حکومت نور لوړ پوړي چارواکي د «بشري جنایت» په تړاو د عدالت مېز ته راکش کړي او سزاوې ورکړي.
د طالبانو او پاکستان ترمنځ له تېرو څو میاشتو راهیسې سیاسي، وسلهوال او سوداګریز کړکېچ روان دی. دواړو لورو پر ډیورند کرښه له یو بل سره نښتې کړي او پاکستان بیا د کابل په ګډون د هېواد ګڼ ولایتونه بمبار کړي، چې پهکې یې ملکي وګړو ته درنه مرګ ژوبله هم اړولې ده.
تر دې وړاندې هم په اروپا امریکا او د نړۍ یو شمېر نورو هېوادونو کې مېشتو افغانانو د لاریونونو په ترڅ کې د پاکستان یاد بریدونه غندلي دي.
د عراق پارلمان د شنبې په ورځ نزار آمیدي، چې یو کُرد سیاستوال دی د یاد هېواد د نوي ولسمشر په توګه غوره کړ. هغه چې د «کردستان میهني اتحادیې» غړی دی، د سیالۍ په ترڅ کې یې د نورو نوماندانو تر څنګ اوسني بهرنیو چارو وزیر ته چې د «کُردستان ډیموکرات ګوند» لهخوا نومول شوی هم ماتې ورکړه.
نزار آمیدي د عراق په شمال کې په دهوک ښار کې زېږېدلی او ۵۸ کاله عمر لري. هغه مخکې د چاپېریال وزیر پاتې شوی او له ۲۰۲۴ کال راهیسې یې په بغداد کې د کُردستان میهني اتحادیې د سیاسي دفتر مشري پر غاړه لرله.
آمیدي همدارنګه د دوو پخوانیو ولسمشرانو، جلال طالباني او فواد معصوم د مرستیال په توګه هم دنده ترسره کړې ده.
د عراق د سیاسي دود لهمخې، لومړی وزیر د شیعه مسلمانانو له منځه، د پارلمان رییس د سُني مسلمانانو له ډلې او ولسمشر د کُردانو له منځه ټاکل کېږي.
د دغه هېواد د اساسي قانون له مخې، نوی ولسمشر ۱۵ ورځې وخت لري څو د لومړي وزیر د ټاکلو بهیر پیل کړي.
په همدې حال کې، د «شیعه ګانو د چوکاټ» په نوم اېتلاف، چې له ایران سره نږدې ډلې پهکې شاملې دي، مخکې اعلان کړی وو، چې نوري المالکي به د خپل نوماند په توګه معرفي کړي، خو دا پرېکړه د امریکا له مخالفت سره مخ شوې ده.
د امریکا ولسمشر ډونالډ ټرمپ په جنورۍ میاشت کې خبرداری ورکړی وو، که نوري المالکي لومړی وزیر شي، واشنګټن به له عراق سره خپلې مرستې بندې کړي.
د آمیدي غوراوی په داسې حال کې شوی، چې عراق د امریکا، اسراییل او ایران ترمنځ د جګړې له اغېزو سخت اغېزمن شوی دی. دا هېواد د دغو شخړو په منځ کې پاتې شوی، ځکه چې ایران ته نږدې وسله والو ډلو پر امریکايي اډو، ډیپلوماټیکو تاسیساتو او د انرژۍ پر مهمو زیربناوو بریدونه کړي دي.
په ځواب کې، امریکا او اسراییل هم پر دغو ډلو هوايي بریدونه کړي چې په ځینو مواردو کې د عراق د امنیتي ځواکونو د غړو د وژل کېدو سبب هم شوي دي.
همدارنګه، د روانې جګړې او د ایران له خوا د هُرمز تنګي د تړل کېدو له امله، د عراق د تېلو صادرات چې د دې هېواد د اقتصاد اصلي ستنه ده تر ډېره بریده درېدلي دي.
د اسلام اباد او ریاض ترمنځ د دفاعي تړون له مخې، پاکستان د سعودي عربستان د امنیت د پیاوړتیا لپاره دغه هېواد ته جنګي الوتکې او نور پوځي ځواکونه استولي دي. د سعودي عربستان دفاع وزارت ویلي چې پاکستانۍ جنګي الوتکې او ملاتړې هوایي الوتکې د ملک عبدالعزیز هوايي اډې ته رسېدلې دي.
د اسلام اباد او ریاض ترمنځ د دفاعي تړون له مخې، پاکستان د سعودي عربستان د امنیت د پیاوړتیا لپاره دغه هېواد ته جنګي الوتکې او نور پوځي ځواکونه استولي دي.
د سعودي عربستان دفاع وزارت ویلي چې پاکستانۍ جنګي الوتکې او ملاتړې هوایي الوتکې ملک عبدالعزیز هوايي اډې ته رسېدلې دي.
په اعلامیه کې ویل شوي چې دا ګام د ګډې دفاعي همکارۍ د پیاوړتیا او د سیمې او نړۍ د امنیت او ثبات د ملاتړ لپاره اخیستل شوی دی.
یوه پاکستاني لوړپوړي چارواکي رویټرز ته ویلي چې دغه ځواکونه «د برید لپاره نه دي هلته استول شوي» بلکې د دفاعي همکارۍ په اډانه کې ځای پر ځای شوي دي.
پاکستاني چارواکي ټینګار کړی چې د دې اقدام هدف ریاض ته ډاډ ورکول دي چې اسلاماباد به د هر ډول احتمالي برید پر وړاندې د سعودي په دفاع کې مرسته وکړي.
پاکستان او سعودي عربستان د ۲۰۲۵کال په سپټمبر کې یو دفاعي تړون لاسلیک کړی چې له مخې یې پر یوه هېواد برید پر دواړو هېوادونو برید ګڼل کېږي.
پاکستان له کلونو راهیسې سعودي عربستان ته پوځي روزنه او مشورتي مرسته برابروي او په بدل کې سعودي عربستان د پاکستان مالي ملاتړ او اقتصادي ستونزو ته رسیده ګي کوي.