کابل کې د رزمي ورزشونو د پسرلني جام سيالۍ د زرو لوبغاړو په ګډون پيل شوې
د رزمي ورزشونو د پسرلني جام سيالۍ د کابل ښار له څه باندې ۱۰۰ کلپونو څخه د نږدې ۱۰۰۰ ورزشکارانو په ګډون د رزمي ورزشونو فدراسیون په نوښت د بدني روزنې په ۵۰۰ کسیز سالون کې پيل شوې دي. په دې سياليو کې د بېلابېلو رزمي سبکونو لوبغاړي له يو بل سره سيالۍ کوي.
دا سيالۍ په څلورو عمري کټګوريو کې ترسره کېږي، چې ماشومان، تنکي ځوانان، ځوانان او لويان پهکې شامل دي.
ټاکل شوې ده، چې دغه سيالۍ د همدې مياشتې تر ۳۰ نېټې پورې دوام وکړي.
مسوولين وايي، دا سيالۍ د رزمي ورزشونو د ودې او پراختيا او همدارنګه د ورزشکارانو د مهارتونو او تجربو د کچې د لوړولو په موخه تنظيم شوې دي.
