امریکا له هرمز تنګي نه د فیس په بدل کې پر تېرېدونکو بیړیو بندیز لګوي
د امریکا ولسمشر ډونالډ ټرمپ ویلي چې د امریکا سمندري ځواک به په هرمز تنګي کې هره هغه بېړۍ ودروي چې د ایران له لوري د لګول شوي فیس په بدل کې د تېرېدو هڅه کوي. نوموړي ویلي، چې ددې پرېکړې پلی کېدل به یوڅه وخت واخلي.
ټرمپ دا څرګندونې په خپل “ټروت سوشل” پاڼه کې وروسته له هغه وکړې چې د امریکا او ایران د سولې خبرې بې پایلې پای ته ورسېدې.
ټرمپ وویل چې خبرې “په ښه ډول و شوې او پر ډېری ټکو هوکړه شوې وه”، خو زیاته یې کړه چې دواړو خواوو د ایران د اټومي پروګرام په اړه موافقه ونه کړه.
د ټرمپ په وینا، د امریکا سمندري ځواک ته امر شوی چې په نړیوالو اوبو کې هغه ټولې بېړۍ وڅاري او ودروي چې ایران ته فیس ورکوي.
